Solmaz Səmədova: “Azərbaycan həqiqətlərini dünyaya çatdırmaq vətəndaşlıq borcumuzdur”
“Azərbaycan həqiqətlərini dünyaya çatdırmaq vətəndaşlıq borcumuzdur”. Müsahibimiz Solmaz Səmədova belə deyir. İxtisasca ingilis dili müəllimi olan bu təhsil işçisi Bakıdakı 221 nömrəli tam orta məktəbin təlim-tərbiyə işləri üzrə direktor müavinidir. Hər zaman ictimai fəallığı ilə seçilən Solmaz müəllim bu dəfə də ənənəsinə sadiq qalaraq Azərbaycanla bağlı həqiqətlərdən danışıb. Özü də Türkiyədə. O, bu günlərdə Türkiyənin Yalova şəhərində böyük nüfuza malik Yafem təşkilatının təşkil etdiyi “Türk Dünyası Mədəniyyət Platforması” adı altında keçirilən “Türk Dünyası Jurnalistlər Konfransı”na (“Türk Qazetəçilər Toplantısı”) qatılıb. Bu tədbir artıq 21 ildir ki, təşkil olunur.
Səfər təəssüratlarını bizimlə bölüşən S.Səmədova bildirib ki, Azərbaycan, Bolqarıstan, Əfqanıstan, Krım, Suriya və İraq türklərinin və digər ölkələrin media mənsublarının qatıldığı toplantıda erməni iddiaları və azərbaycanlıların soyqırımı, Orta Şərqdən Qafqaza, Balkanlardan Orta Asiyaya uzanan Türk mədəniyyət coğrafiyasının əsas problemləri və digər məsələlər müzakirə mövzusu olub. Bir sözlə, 60-dan çox ölkəni təmsil edən jurnalistlər bir yerə toplanaraq hər kəs öz siyasi problemlərindən söz açıb.
Solmaz müəllim Azərbaycan nümayəndə heyətinin bu tədbirdə xüsusi fəallıq nümayiş etdirdiyini deyir:
“Mən Azərbaycanı bir təhsil işçisi kimi təmsil edirdim. Budur məni qürurlandıran. İyirmi beş ildən çoxdur ki, fənnimi şagirdlərimə sevə-sevə tədris etməklə yanaşı, onlara doğma Vətənimizə layiq olmaq, sevmək, müqəddəs torpaqlarımızı qorumaq kimi vətənpərvərlik hisslərini aşılamaqdan məmnunam.
Toplantıda bizim ən ağrılı problemimiz olan Ermənistan-Azərbaycan, Dağlıq Qarabağ münaqişəsindən danışdıq. Xalqımızın haqqını müdafiə edərək işğal altında olan torpaqlarımızdan söz açdıq. Torpaqlarımızın bir qarışını belə düşmənə güzəştə getməyəcəyimizi bir daha diqqətə çatdırdıq”.
Tədbirdə işğalçı Ermənistanın mənfur siyasətinə, həyata keçirdiyi terrora qarşı Türkiyə Azərbaycan birgə qardaşlığının mübarizə apara biləcəyini xüsusi vurğuladıqlarını söyləyən həmsöhbətim daha sonra çıxışları zamanı bu günə kimi erməni işgəncələrinə məruz qalan Dilqəm Əsgərov və Şahbaz Quliyevin geri qaytarılmasının vacibliyini də önə çəkdiklərini bildirir: “Azərbaycan həqiqətlərini nəinki beynəlxalq ictimaiyyətə çatdırdıq, eyni zamanda ölkəmiz üçün önəmli məsələlərin Yalova deklarasiyasında üçüncü maddə olaraq qeyd olunmasına da nail olduq. Çox şükür ki, bütün səylərimiz boşa getmədi. Haqqında danışdığımız bütün məsələlərin Yalova deklarasiyasına bir maddə olaraq salınması düşünürəm ki, olduqca əhəmiyyətli bir hadisədir. Mən orada ingilis dilində çıxış etdim. Eyni zamanda nümayəndə heyətimizin çıxışlarını da ingilis dilində tərcümə edirdim. 60-dan artıq dövləti təmsil edən media mənsublarına Azərbaycan həqiqətləri barədə ətraflı məlumatları çatdırmağa nail olduq. Bilirsiniz, Dağlıq Qarabağ münaqişəsindən, Xocalı soyqırımı, erməni terrorundan əziyyət çəkən dinc əhali, Dilqəm və Şahbaz başda olmaqla işgəncələrə məruz qalan minlərlə əsir və girovlarımızın acınacaqlı taleyi haqqında çıxışlarımız zamanı dərdimizə ortaq olan jurnalistlərə baxanda göz yaşlarıma hakim ola bilmirdim. Çıxışımda qeyd etdim ki, Dağlıq Qarabağda başlayan münaqişə nəticəsində ərazisinin 20%-i işğal edilən Azərbaycan artıq uzun illərdir ki, Ermənistanın təcavüzkar siyasətindən əziyyət çəkir.
Dünya mediasının Azərbaycanın üzləşdiyi problemin, işğal aktının düzgün şəkildə işıqlandırmasını, onun geniş auditoriyaya çatdırılmasının vacibliyini önə çəkdim. Çox təəssüf ki, bu məsələyə yanaşmada hələ də diqqətsizlik nümayiş etdirilir. Biz media mənsublarına məsələyə daha həssaslıqla yanaşmağı tövsiyə edərək, Dağlıq Qarabağla bağlı əsl həqiqətlərin dünya ictimaiyyətinə çatdırılmasında maraqlı olduğumuzu bir daha bəyan etdik”.
Solmaz xanım danışdıqca ondakı Vətən təəssübkeşliyinə, torpağa bağlılığına heyran qalmamaq mümkün deyil. Öz fikirlərini həm azərbaycanca, həm də ingilis dilində mükəmməl çatdırmağı bacaran pedaqoq ictimai fəaliyyəti ilə yanaşı müəllimlikdən də xüsusi zövq aldığını deyir. Ən böyük arzusu işğal altında olan torpaqlarımızda, Şuşa məktəbində dərs deməkdir: “Bir müəllim kimi Azərbaycan Prezidenti İlham Əliyevin ölkəmizin ərazi bütövlüyü ilə bağlı qətiyyətli mövqeyini tam dəstəkləyərək böyüməkdə olan gənc nəslin heç bir halda və heç bir sahədə düşmənə güzəştə getməz, qorxmaz bir vətəndaş kimi yetişməsi üçün bundan sonra da əlimdən gələni əsirgəməyəcəyəm”.
Samirə KƏRİMOVA