Bakı Mühəndislik Universiteti  Texnoparkının təşkilatçılığı ilə Proqram təminatı bazarında dünya liderlərindən biri olan  SAP şirkətinin nümayəndəsi Yuriy Kupriyanov və şirkətin Azərbaycan üzrə rəhbəri Rüfət Hacıyev  universitetdə olublar.  Universitetin rektoru, professor Havar Məmmədov qonaqları qəbul edib və universitet haqqında ətraflı məlumat verib.  Bildirib ki, Bakı Mühəndislik Universiteti öz kadrlarını cari bazar ehtiyaclarına uyğun olaraq hazırlamağa böyük diqqət yetirir. “Universitetdə tədris olunan ixtisasların əsasən ingilis dilində olması və Texnoparkın fəaliyyəti bizə imkan verir ki, beynəlxalq layihələrdə iştirak edək”-deyə o vurğulayıb.

 

Şirkətin fəaliyyəti haqqında məlumat verən Yuriy Kupriyanov qeyd edib ki, SAP proqram təminatı 293.500-dən çox  müştəri tərəfindən istifadə olunur. Universitet İttifaqı olan SAP-ın məqsədi universitetləri, tələbələr və işgüzar nümayəndələri birləşdirməkdir. Bütün iştirakçılar üçün əlverişli olan qlobal proqram, kadr çatışmazlığını doldurmağa və müxtəlif sənaye sahələrində gələcək mütəxəssisləri tapmaq problemini həll etməyə kömək edir. Tələbələr biznes proseslərinin alqoritmini başa düşərək böyük data və ən yaxşı İT sistemləri ilə işləmək üçün öz bacarığını artıra və Azərbaycan iqtisadiyyatına əhəmiyyətli töhfə verə bilər.

     

Rektorla görüşdən sonra Texnoparkda dekan və kafedra müdirlərinin iştirakı ilə gələcəkdə universitetlə SAP arasında qurulacaq əməkdaşlığın müzakirəsi keçirilib. Müzakirə zamanı Texnoparkin müdiri Samir Məmmədov vurğulayıb ki, Bakı Mühəndislik Universiteti  SAP-la əməkdaşlıq etməklə dünyanın 109 ölkəsində 3100 təhsil müəssisəsi, innovasiya və  akademik mərkəzləri, start-up və tədqiqat layihələri şəbəkəsinin bir hissəsi olacaq. Real biznes halları və qabaqcıl şirkətlərin təcrübəsi əsasında yaradılan kurslara giriş universitetə keyfiyyətli, bacarıqlı və ixtisaslı mütəxəssislər yetişdirməyə imkan verəcəkdir. Həmçinin Universitet  İttifaqına qoşulma universitet müəllimlərinin SAP ustad dərslərində pulsuz iştirakına imkanı verir. Universitetinin müəllim və tələbələri SAP Learning Hub Online Portal vasitəsilə təlim kursları və materiallarına daxil olaraq müasir texnoloji mövzularda assosiativ model proqramının iştirakçısı olacaq.