“Rəssamlıq sadəcə əyləncə deyil” | |
Bu yazıda oxuculara təqdim etdiyim istedad sahibi də öz yaradıcılıq potensialı ilə diqqəti cəlb edən bir yeniyetmədir. Erkən yaşlarından sadəcə uşaq marağı ilə rəsm çəkməyə böyük həvəs göstərən həmsöhbətim illər ötdükcə bu sənətin incəliklərinə əzmkarlığı sayəsində dərindən yiyələnib və nəhayət bu müddət ərzində çoxlu sayda müsabiqələrin qalibi olub. Əminəm ki, onu dinləmək mənə necə xoş təsir bağışladısa, sizin üçün də o dərəcədə maraqlı olacaq.
Milli üslub və qrafika
2003-cü ildə Bakı şəhərində anadan olmuşam. İlk ibtidai təhsilimi İlyas Əfəndiyev adına Elitar Gimnaziyada almışam. Hazırda paytaxtdakı Fizika- riyaziyyat və informatika təmayüllü liseyin IX sinfində təhsil alıram. Uşaqlıqdan rəsm çəkməyə həvəs göstərmişəm. Bunu nəzərə alaraq valideynlərim məni Nizami Rayon Uşaq-Gənclər Yaradıcılıq Mərkəzinin rəsm dərnəyinə yazdırıblar. Dərnək müəllimim Nərminə Abdullayevanın diqqət və qayğısı sayəsində isə bu sənətin sirlərinə həvəslə yiyələnmişəm. Doğrusu, rəsm çəkməyi əvvəllər sadəcə bir əyləncə, bir hobbi sayırdım. Ağac, dağ, çay rəsmlərini rahatca çəkib əvvəlcə anama, sonra isə müəllimimə göstərirdim, onlar da baxıb,- çalışsan, daha yaxşı çəkə bilərsən,- söyləyirdilər. Mən hələ onda dərk edə bilmirdim ki, rəsmin də öz dili, insanları düşündürə biləcək dərin fəlsəfəsi olmalıdır. Sonradan öyrəndim ki, bunun adına yaradıcılıq deyirlər. Sən demə əlinə fırça alıb nəsə bir rəsm çəkəndə onu fantaziyanın süzgəcindən keçirəsən, mövzü üzərində özün kifayət qədər düşünəsən ki, tamaşaçını da düşündürə biləsən. Dərk etdim ki, rəssamlıq sadəcə bir əyləncə deyil, incə, həssas bir sahədir. Rəsmlərimdə milli üsluba, qrafikaya daha çox üstünlük verməyə çalışıram. Bütün arzularımı çəkdiyim rəsmlərdə ifadə etməyə və rənglərin dili ilə bunu səssiz-səmirsir göstərməyə nail oluram.
İlk fərdi sərgim
4-cü sinifdə oxuyarkən “Abşeronun övladları” sənət klubunun üzvü idim, ilk fərdi sərgim də onda keçirildi. Çox həyəcanlı idim, tamaşaçılar və sərgiyə dəvət olunan qonaqlar tərəfindən necə qarşılanacağını təsəvvür edə bilmirdim. Bu təbii hal idi, çünki zövqlər müxtəlif olduğundan rəsmlərim kimlərinsə xoşuna gəlməyə də bilərdi. Amma şükürlər olsun ki, ötəri olan bu sıxıntılı anlar sonda sevinc göz yaşları ilə əvəzləndi, hamı məni təbrik etdi, hətta bu sənətin biliciləri tərəfindən də müsbət qarşılandı. Sərgidə 29 qrafik rəsmim və 7 tablom nümayiş olundu. Sonda Abşeron Qalereyasının direktoru, sənətşünas Eldəniz İbrahimov rəsmlərim haqqında xoş sözlər söylədi və mənə yeni-yeni yaradıcılıq uğurları arzuladı. Bu, mənə bir stimul, bir ruh yüksəkliyi bəxş etdi.
“Vergilər uşaqların gözü ilə”
Dəfələrlə həm respublikadaxili, həm də beynəlxalq rəsm müsabiqələrində iştirak edərək birincilik qazanmışam. 2008-ci ildə Hüseyn Cavid adına parkda 1 İyun - Uşaqların Beynəlxalq Müdafiəsi Günü münasibətilə Vergilər Nazirliyinin və Tofiq İsmayılov adına Uşaq-Gənclər Yaradıcılıq Sarayının Rəsm qalereyasının təşkilatçılığı ilə “Vergilər uşaqların gözü ilə” adlı rəsm müsabiqəsi keçirildi. Sərgidə Azərbaycanın mədəniyyət və incəsənət xadimlərinin iştirakı ilə uşaqlar üçün böyük bayram şənliyi də təşkil olunmuşdu. Rəsm müsabiqəsində 5-8, 9-12 və 13-17 yaş kateqoriyalarına aid olan məktəblilər iştirak edirdilər. Tədris prosesi zamanı vergilər barədə müəllimlərimizdən və valideynlərimizdən aldığımız bilgilər sayəsində yaratdığımız rəsmlər nümayiş olundu. Bu müsabiqədə mənim fantaziyam yüksək dəyərləndirildi və II yerə layiq görüldüm.
Diplomla mükafatlandırıldım
2010-cu ildə uşaqlar arasında keçirilən “Təmiz şəhərim” adlı rəsm sərgi müsabiqəsində qazandığım uğur da məni çox sevindirdi və II yerin sahibi oldum. 2012- ci ildəsə “Dədə Qorqud” Fondu və “Azərbaycan dünyası” beynəlxalq jurnalı tərəfindən keçirilən “Dədə Qorqud uşaqların gözü ilə” sərgisində nümayiş olunan rəsmlərimə görə diplomla mükafatlandırıldım.
Polşadan gümüş medalla
Eşidəndə ki, 2015-ci ildə Polşada XVIII beynəlxalq uşaq rəsm müsabiqəsi keçiriləcək, çox sevindim və mən də yarışa qatıldım, amma yenə də çox həyəcanlı idim. Bilirdim ki, beynəlxalq müsabiqələrə olduqca sanballı mütəxəssislər tərəfindən yüksək qiymətləndirilən əsərlər təqdim olunur. Bu məsuliyyəti dərindən dərk etdiyimə görə bəlkə həvəsləndirici mükafatla da qane olardım. Amma sonda həyəcanıma heç bir əsasın olmadığının şahidi oldum və gümüş medala layiq görüldüm. Sanki, onda mənə bir dünya sevinc bəxş edildi. Qazandığım uğurlar məni ruhlandırır, daha məhsuldar çalışmağıma təkan verir. Bunun bəhrəsidir ki, növbəti il bir-birinin ardınca Polşada tanınmış rəssam Van Qoqa həsr olunmuş beynəlxalq uşaq rəsm sərgisində, Sloveniyada keçirilən XXII beynəlxalq uşaq və Xətai İncəsənət Mərkəzində keçirilən “Mənim düşüncəm” adlı rəsm müsabiqələrində rəsm əsərlərim I yerləri qazandı.
“Mənim düşüncələrim”
2017-ci il mənə daha bol sevinc hissləri yaşatdı. Yunanıstanda keçirilən “Musiqi yollarında” adlı VII beynəlxalq rəsm müsabiqəsində I yerin sahibi oldum. Həmin ilin 24 mayında “Mənim rəngli düşüncələrim” adlı ikinci fərdi sərgim keçirildi. Sərgidə 50-dan çox rəsm əsərim nümayiş olundu. Burada həm sulu, həm də yağlı boya ilə işlənmiş rəsm əsərlərim təqdim olunurdu. Sərgidə çoxlu qonaqlar, müəllimlər və məktəb şagirdləri iştirak edirdilər. Üzlərdəki təbəssüm hisslərindən razılıq ifadələri oxunurdu. Müəllimlərim, sinif yoldaşlarım, dostlarım da sevinclərini gizlədə bilmirdilər. Bu, mənim üçün olduqca xoş idi, çünki bu xoş əhvali-ruhiyyəni onlara yaşadan mənim əsərlərim, rənglərin dili ilə möcüzələr yaradan firçam idi.
Qran-pri mükafatı
Ümumiyyətlə, 2017-ci il mənim üçün çox uğurlu olub. 2017-ci ilin mayında IV İslam Həmrəyliyi Oyunları Respublika təsviri sənət müsabiqəsinin Qran-pri mükafatını qazanmışam. Bolqarıstanın Nova Zagora şəhərində keçirilən XIX beynəlxalq rəsm müsabiqəsində diplomla, Finlandiyada keçirilən “Birlikdə” adlı XVI beynəlxalq və ölkəmizdə keçirilən “Dostluğun sehri” adlı II beynəlxalq uşaq rəsm müsabiqələrində II yerlərin qalibi olmuşam. Hindistanda keçirilən IX uşaq və gənclərin beynəlxalq rəsm müsabiqəsində isə münsiflər heyətinin xüsusi diplomuna layiq görülmüşəm. ...Məktəbdə də nümunəvi şagirdlərdən biriyəm. Riyaziyyat fənninəsə daha çox maraq göstərirəm. Mən həm də I dərəcəli şahmatçıyam. Gələcəkdə beynəlxalq yarışlarda bu idman növünün də şərəfini qorumağı qarşıma məqsəd qoymuşam.
Sifai SƏFƏROVA |
|
26.02.2018 | 11:00 | |
|
|
|