Rusiyanın daha bir ali məktəbi Azərbaycanda filial açır

Rusiyanın Moskva Dövlət Humanitar- İqtisad Universiteti Azərbaycanda  öz filialını  açmağa hazırlaşır.  Bu barədə  Rusiyanın təhsil və elm naziri Olqa Vasilyeva bildirib.  Rusiyanın "Ria-novosti"  agentliyinə verdiyi geniş müsahibədə nazir  rəhbərlik etdiyi qurumun MDB ölkələri üzrə əsas fəaliyyət hədəflərinə toxunub.  O.Vasilyeva Moskva Dövlət Humanitar- İqtisad Universitetinin Azərbaycanda filialının açılması məsələsinə də toxunub və qeyd edıb ki,  bu layihənin reallaşdırılması ilə bağlı sənədlər Azərbaycan tərəfinə təqdim olunub və hazırda ərazinin seçilməsi üzrə işlər aparılır.  Xatırladaq ki, Moskva Dövlət Humanitar- İqtisad Universitetinin Bakı filialının açılması məsələsi ötən il rusiyalı nazirin ölkəmizə səfəri zamanı da  müzakirə olunub. 

 

Qeyd edək ki, O.Vasilyevanın fəxri professoru və himayədarlar şurasının üzvü olduğu bu ali təhsil müəssisəsində məhdud imkanlı tələbələr də təhsil alırlar.   Hazırda bütün dünyada  məhdud imkanlı şəxslərin təhsil aldığı  yeganə ali məktəbə  2006-cı ildən azərbaycanlı rektor, professor Vaqif  Bayramov rəhbərlik edir.  Universitetin 7 fakültəsində  17 hazırlıq istiqaməti üzrə - bakalvriat, magistratura, aspirantura səviyyələrində kadr hazırlığı həyata keçirilir.  Məzunları arasında Paralimpiya oyunlarının çempionları olan universitetdə azərbaycanlı gənclər də təhsil alır.
 

Oruc MUSTAFAYEV

 

 

 

 



06.03.2018 | 12:40