Ehtiyaclara görə maliyyələşmə mövzusunda seminar

İyunun 24-də "Crescent Beach Hotel"də "Məktəblərin maliyyə formulası: ehtiyaclara görə maliyyələşmə, ədalətlilik, şəffaflıq və cavabdehlik" mövzusunda seminar öz işinə başladı. Azərbaycan Respublikası Təhsil Nazirliyi, YUNESKO, bu qurumun Təhsilin Planlaşdırılması üzrə Beynəlxalq İnstitutu, Açıq Cəmiyyət İnstitutu Yardım Fondu və Müasir Təhsil və Tədrisə Yardım Mərkəzinin birgə təşkilatçılığı ilə 24-27 iyun tarixlərində keçiriləcək seminarın açılış mərasimində Maliyyə Nazirliyi, qeyri-hökumət təşkilatları, adambaşına maliyyələşdirmə üzrə islahatların aparıldığı 3 pilot rayonun nümayəndələri, təhsil və maliyyə üzrə ekspertlər və KİV təmsilçiləri iştirak edirdilər.

Müasir Təhsil və Tədrisə Yardım Mərkəzinin rəhbəri Elmina Kazımzadə tədbiri açaraq sözü təhsil  naziri  Misir  Mərdanova verdi.

Seminar iştirakçılarını salamlayan təhsil naziri dəvəti qəbul edən xarici qonaqlara, eləcə də bu tədbirin təşkilində əməyi olan təşkilat və qurumlara Təhsil Nazirliyi  adından  təşəkkürünü  bildirdi.

Misir Mərdanov ölkə Prezidenti cənab İlham Əliyevin təhsilin keyfiyyətinin yüksəldilməsinə yönəlmiş fəaliyyətindən söz açaraq son dövrlər bu istiqamətdə atılan mühüm addımlar, məktəb tikintisi və təmiri, təhsil müəssisələrinin müasir avadanlıqlarla təminatı, təhsilin məzmununun yeniləşdirilməsi və s. ilə bağlı həyata keçirilən tədbirlər haqqında məlumat verdi. Seminarın müzakirə obyekti olan məktəblərin maliyyələşdirilməsi məsələsinin hazırda çox aktual olduğunu deyən nazir daha sonra ölkəmizdə bu istiqamətdə aparılan islahatların gedişi ilə əlaqədar faktları diqqətə çatdırdı.

O bildirdi ki, Dünya Bankının dəstəyi ilə 2006-cı ildən başlayaraq bu işi reallaşdırmağa cəhd göstərilmiş, yalnız 2007-ci ildə 3 pilot rayonun 59 məktəbində (Ucar rayonunda 20, Şirvan şəhərində 14, İsmayıllı rayonunda 25 məktəb) həyata keçirilməsi qərara alınmışdır. Həmin vaxtdan keçən müddət ərzində hər 3 rayonda bu məsələ ilə bağlı Təhsil Nazirliyinin əməkdaşlarının, maliyyə qurumlarının, təhsil ictimaiyyətinin və məktəb direktorlarının iştirakı ilə seminarlar, nazirlikdə bir neçə dəfə müzakirələr təşkil olunmuş kollegiya iclası keçirilmişdir.

Dünyanın əksər inkişaf etmiş ölkələrində və keçmiş MDB məkanında adambaşına maliyyələşdirmə üzrə islahatlar artıq bir neçə ildir ki, uğurla həyata keçirilsə də, Azərbaycanda istənilən nəticənin hələ də əldə olunmadığını təəssüflə qeyd edən nazir bu baxımdan öyrədici xarakter daşıyan seminarın xüsusi əhəmiyyət kəsb etdiyini vurğuladı.

Misir Mərdanov bu tədbirə bizim öyrənmək istədiklərimizi bilən ekspertlərin dəvət olunduğunu deyərək iştirakçılara 4 gün davam edəcək seminarın işində, müzakirələrdə fəal iştirak etməyi, mövzu ilə bağlı təqdim olunan beynəlxalq təcrübəni dərindən öyrənməyi tövsiyə etdi. O, burada söylənilənlərin həmin istiqamətdə Azərbaycan üçün işlək mexanizm yaradılmasına böyük təsir göstərəcəyinə əmin olduğunu bildirdi və seminarın işinə uğurlar arzuladı.

Seminarın ilk günü "Maliyyə formulası nədir?" mövzusunda mühazirələr dinlənildi və bununla bağlı müzakirələr aparıldı. İştirakçılar YUNESKO-nun təmsilçisi Muriel Puassonun "Maliyyə formulasına dair ümumi təqdimat: beynəlxalq təcrübə", Litva Təhsil və Elm Nazirliyi ümumtəhsil departamentinin direktoru Arunas Plikşnysun "Litvada təhsilin  maliyyələşmə islahatları", Təhsil Nazirliyinin aparıcı məsləhətçisi Ramil Orucovun "Azərbaycan təhsilində adambaşına maliyyələşdirmənin tətbiqi və mövcud problemlər" və Şirvan şəhər 9 nömrəli məktəbin Məktəb Şurasının sədri Seymur Bağırzadənin "Pilot məktəblərində tətbiq olunan maliyyə formulasının təqdimatı" mövzularında çıxışlarını dinlədilər.

Sonrakı günlərdə "Maliyyə formulasını necə tətbiq etməli?", "İmkanları necə artırmalı?" və "Şagirdlərin qiymətləndirilməsində şəffaflığı necə təkmilləşdirməli?" mövzularında təqdimat və müzakirələrin  keçirilməsi nəzərdə tutulur.

Hicran ƏKBƏROVA