|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Naxçıvan Dövlət Universitetində
"Uzaq regionlar üçün səciyyəvi olan informasiya və
kommunikasiya texnologiyaları problemləri" mövzusunda
perspektiv şəbəkələndirmə üzrə NATO işçi
elmi seminarı (Şəbəkə idarəetməsi üzrə
VI CEENet işçi elmi seminarı) keçirildi. Tədbir NDU,
Şimali Atlantika Birliyi, Mərkəzi və Şərqi
Avropa Şəbəkələndirmə Assosiasiyasının
(Polşa) təşkilatçılığı ilə gerçəkləşdirildi.
Elmi seminarın iştirakçıları öncə ümummilli
lider Heydər Əliyevin abidəsini ziyarət etdilər,
dahi öndərin ev muzeyində oldular. Sonra qonaqlar
universitetdəki CİSKO Akademiyası və müxtəlif
İnternet zalları ilə tanış oldular. İlk plenar iclas Naxçıvan Dövlət
Universitetinin elmi işlər üzrə prorektoru, AMEA-nın
müxbir üzvü Vəli Hüseynovun sədrliyi ilə keçirildi.
Prorektor tədbir iştirakçılarını salamlayaraq
Azərbaycanda informasiya və kommunikasiya texnologiyalarının
inkişafı istiqamətində görülən uğurlu işlərdən
danışdı, elmi seminarın məqsədini açıqladı.
Natiq Beynəlxalq Məsləhət Komitəsinin
həmsədrlərindən olan, NATO-nun Qafqaz üzrə müşaviri,
Mərkəzi və Şərqi Avropa Şəbəkələndirmə
Assosiasiyasının Baş katibi, professor Gasek Qajevski çıxış
edərək bildirdi ki, NATO hərbi-siyasi blok olmasına
baxmayaraq, elm, texnika və səhiyyənin inkişafına
xidmət edən mülki xarakterli proqramların həyata keçirilməsinə
xüsusi önəm verir. Qajevski coğrafi və siyasi
səbəblər üzündən uzaq düşmüş regionlarda
informasiya texnologiyalarının tətbiqinin
əhəmiyyətindən bəhs etdi. Natiq erməni işğalı
nəticəsində uzun illər blokadada yaşayan Naxçıvanın
da bu cəhətdən xüsusi maraq doğurduğunu söylədi. Nyu-York Universitetinin professoru Corc Sadovski,
Kanadanın Simon Freyzer Universitetinin professoru Stela Atkins çıxış
edərək sivil cəmiyyətdə informasiya
texnologiyalarından istifadənin mühüm rolundan bəhs
etdilər. NDU-nun fizika-riyaziyyat fakültəsinin dekanı,
fizika-riyaziyyat elmləri namizədi, dosent Fərman Qocayev
keçiriləcək beynəlxalq elmi seminarın uzun illər
blokadada olan Naxçıvan MR üçün
əhəmiyyətindən danışdı. Elmi seminar "Milli və beynəlxalq
miqyasda şəbəkələndirmə: əməkdaşlıq
və texniki həllər" mövzusunda bölmə iclası
ilə işini davam etdirdi. Növbəti gün elmi seminar plenar iclasla işini
davam etdirdi. ABŞ-ın Nyu-York Universitetinin professoru Corc
Sadovski "çətin giriş imkanı olan ssenarilər: mümkün
cavablar" mövzusunda məruzə etdi. Amerikalı professor
İnternetdən istifadənin sürətliliyinin təmin
edilməsi, müəyyən texniki problemlərin aradan qaldırılması,
İnternet şəbəkələrinin müxtəlif növləri
haqqında ətraflı məlumat verdi. Kanadanın Simon Freyzer Universitetinin professoru
Stela Atkins "Uzaq regionlarda təcili tibbi
telesəhiyyə xidmətlərinin təchizində yeni çağırışlar"
mövzusunda məruzəsində Alyaska və Dunay çayı
deltasının timsalında ucqar ərazilərdə yaşayan
əhaliyə təcili tibbi yardım göstərilməsi
zamanı informasiya və kommunikasiya texnologiyalarının
tətbiqindən danışdı. Fasilədən sonra elmi seminar bölmə
iclaslarında işini davam etdirdi. "Mərkəzdən
uzaq olan regionlar üçün elektron elm, distant təhsil və
elektron səhiyyə xidmətləri" mövzusunda keçirilən
bölmə iclasında AMEA-nın müxbir üzvü, AMEA-nın
İnformasiya Texnologiyaları İnstitutunun direktoru Rasim
Əliquliyev "Elektron-elm: müasir vəziyyət,
problemlər və həllər" mövzusunda
məruzə etdi. Sonra Azərbaycan Respublikasının
İnformasiya və Kommunikasiya Texnologiyaları Nazirliyinin
Strateji planlaşdırma və elmi potensial şöbəsinin
müdiri, professor İlham Mərdanov "Universitet
təhsilində innovativ tədris ideyaları", Naxçıvan
Dövlət Universitetinin elmi işlər üzrə prorektoru,
AMEA-nın müxbir üzvü Vəli Hüseynov "Elmi kadrların
hazırlanmasında və beynəlxalq tədqiqatlarda
informasiya və kommunikasiya texnologiyalarının rolu",
özbəkistanı təmsil edən, məktəb kompüter
və İKT təlimi üzrə yerli məsləhətçi,
dosent Sayyora Rəhmankulova "özbəkistanın ucqar
regionlarından olan müəllimlər üçün distant öyrənmənin
imkanlarına dair təcrübə və perspektivlər"
mövzusunda məruzələr etdilər. "Kampus şəbəkəsi, uzaq
regionların universitetlərində informasiya və
kommunikasiya texnologiyaları, şəbəkə təhlükəsizliyi,
innovasiya zonaları" adlanan bölmə iclası
Azərbaycan Texniki Universitetinin rektoru Havar Məmmədovun
"Uzaq regionların informasiya və kommunikasiya
xidmətlərinə giriş imkanının təşkili"
mövzusunda məruzəsi ilə başladı. İclasda
Azərbaycan Respublikasının Rabitə və İnformasiya
Texnologiyaları Nazirliyinin İnformasiya cəmiyyətinin
inkişafı şöbəsinin müdiri Rüfət Cülməmmədovun
"Azərbaycan iqtisadiyyatının diversifikasiyasında
regional innovasiya zonasının rolu", Lənkəran Dövlət
Universitetinin əməkdaşı ülkər Bayramovanın
"Ucqar regionlardakı ali məktəblər üçün kampus
şəbəkə kommunikasiyaları və onların
problemləri" mövzusunda məruzələri
dinlənildi. Elmi seminarın zirvə tədbirindən öncə
müxtəlif ölkələrin nümayəndələri və
digər qonaqlar Naxçıvan MR Ali Məclisinin sədri Vasif
Talıbovun qəbulunda oldular, regionda informasiya və
kommunikasiya texnologiyalarının inkişaf etdirilməsi
məsələsi geniş müzakirə edildi. Naxçıvan Dövlət Universitetinin tanıtma
filminin nümayişi ilə başlayan zirvə
tədbirində Azərbaycan Respublikasının Rabitə
və İnformasiya Texnologiyaları naziri Əli Abbasov
"Azərbaycan Respublikasının regionlarda şəbəkə
infrastrukturunun inkişafının prioriteti
istiqamətləri" mövzusunda məruzə etdi. Nazir ümummilli
lider Heydər Əliyevin Azərbaycanda informasiya və
kommunikasiya texnologiyalarının inkişaf etdirilməsi
istiqamətində mühüm işlər gördüyünü, dahi öndərin
bu sahədəki uğurlu siyasətinin dövlət başçısı
İlham Əliyev tərəfindən uğurla davam
etdirildiyini bildirdi. NATO-nun Qafqaz üzrə müşaviri Gasek
Qajevski "Naxçıvan Dövlət Universiteti üçün WiMax
şəbəkəsi" mövzusunda məruzə
edərək universitetin bu şəbəkə
vasitəsilə bir il ərzində ən güclü və müasir
İnternet kampusuna çevriləcəyini bildirdi. NDU-nun rektoru, akademik İsa Həbibbəyli
"Naxçıvan Dövlət Universiteti üçün informasiya və
kommunikasiya texnologiyaları konsepsiyasının
səciyyəvi xüsusiyyətləri" mövzusunda
məruzə etdi. Rektor qeyd etdi ki, "Elektron Naxçıvan:
problemlər və həllər", "Elmin və
təhsilin inkişafında informasiya və kommunikasiya
texnologiyalarının rolu və əhəmiyyəti",
"İnformasiya cəmiyyəti: reallıqlar və
perspektivlər" kimi "Elektron Naxçıvan"
proqramları məhz bu ali təhsil ocağında reallaşdırılmışdır.
Türkiyənin Kocaeli Universitetinin rektoru,
professor Sezər Kamsuoğlu, Qars Qafqaz Universitetinin rektoru,
professor Abumüslüm Güven çıxışlarında dünyada
tanınmaqda olan Naxçıvan Dövlət Universitetini
informasiya və kommunikasiya texnologiyalarının inkişafı
istiqamətində layiqli tərəfdaş kimi gördüklərini
qeyd etdilər. Beynəlxalq elmi seminarın iştirakçılarının
Azərbaycan Respublikasının Prezidenti cənab İlham
Əliyevə müraciəti qəbul olundu. Tədbir NDU-nun Konservatoriyasının müəllim
və tələbələrinin hazırladığı
konsert proqramı ilə başa çatdı. Mehriban SULTAN, Naxçıvan Dövlət Universiteti
mətbuat
|