|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Polis Akademiyasında tədris prosesinin informasiyalaşdırılması yeni mərhələdə Bəşəriyyət
üçüncü minilliyə informasiya və kommunikasiya texnologiyalarının
(İKT) sürətli inkişafı ilə qədəm qoymuşdur.
Hazırda informasiya texnologiyaları ümumi inkişafa
təsir göstərən əsas amillərdən birinə
çevrilməklə dövlət və cəmiyyətin bütün
institutlarını, iqtisadi və sosial sahələri, elm,
təhsil və mədəniyyəti, bütövlükdə
insanların həyat tərzini əhatə edir. Hüquq-mühafizə
orqanları fəaliyyətində informasiya və
kommunikasiya texnologiyalarının istifadə olunmasının
effektivliliyi daxili işlər orqanlarının
əməkdaşlarının müasir kompüter texnologiyaları
ilə işləmə vərdiş və bacarıqlarını
mənimsəmə səviyyələrindən asılıdır.
Bu funksiyanın həyata keçirilməsində DİN-in
Polis Akademiyası xüsusi ali təhsil müəssisəsi kimi
müstəsna rola malikdir. Müasir dövrün səciyyəvi xüsusiyyətlərindən
biri həyatın bütün sahələrinin informasiyalaşdırılması,
informasiya cəmiyyətinin yaradılmasıdır. Hər
bir dövlətin və cəmiyyətin strateji
fəaliyyət sahəsi olan təhsil də bu
cəhətdən istisna deyildir. Təhsil sistemində
informasiya və kommunikasiya texnologiyalarından istifadə
bir sıra məsələlərin birgə həllini
tələb edən kompleks problemdir. Onun optimal həlli
isə istifadə edilən İKT vasitələrinin
həm texniki imkanlarının, həm də tədris
prosesində səmərəli istifadə yollarının
təhlilini aparmadan mümkün deyildir. Nəzərə alsaq
ki, təhsil sisteminin informasiyalaşdırılması keçici
bir mərhələ deyil, davamlı inkişafın ardıcıl
tələbidir, onda məsələnin vacibliyi bir daha aydın
olur. Təhsil sahəsində informasiya
texnologiyalarının zəruriliyini diktə edən
əsas amillərdən biri təhsil pilləsindən asılı
olmayaraq bütün təhsil alanlarda informasiya texnologiyalarından
istifadə vərdişlərini formalaşdırmaqdan
ibarətdir. Azərbaycan Respublikasında müasir
informasiya və kommunikasiya texnologiyalarını geniş
tətbiq etməklə vahid ümummilli təhsil mühitinin
yaradılması və əhalinin bütün
təbəqələri üçün keyfiyyətli təhsil almaq
imkanlarının təmin edilməsi məqsədi ilə
"2008-2012-ci illərdə Azərbaycan Respublikasında
təhsil sisteminin informasiyalaşdırılması üzrə
Dövlət Proqramı"nın təsdiq edilməsi haqqında"
Azərbaycan Respublikası Prezidenti İlham Əliyev
tərəfindən 10 iyun 2008-ci il tarixli sərəncam
imzalanmışdır. Təhsil sistemində İKT
infrastrukturunun inkişaf etdirilməsi, elektron təhsil
texnologiyalarının tətbiqinin genişləndirilməsi,
təhsil sistemində idarəetmənin informasiyalaşdırılması
və kadr potensialının gücləndirilməsi
tədbirləri Dövlət Proqramının həyata keçirilməsinin
əsas özəyini təşkil edir. Dövlət Proqramının
əsas məqsədi təhsilin bütün
pillələrində müasir informasiya və kommunikasiya
texnologiyalarının səmərəli tətbiqi və
istifadəsi ilə vahid ümummilli təhsil mühitinin formalaşdırılması
və bu zəmində əhalinin bütün
təbəqələri üçün keyfiyyətli təhsil almaq
imkanlarının təmin edilməsi, habelə ölkənin
təhsil sisteminin dünya təhsil məkanına inteqrasiya
olunması üçün şəraitin yaradılmasıdır.
Həmin strateji məqsədə çatmaq üçün aşağıdakı
istiqamətlərdə müvafiq işlərin aparılması
nəzərdə tutulmuşdur: - təhsil sistemində İKT
infrastrukturunun inkişaf etdirilməsi; - elektron təhsil texnologiyalarının
tətbiqinin genişləndirilməsi; - təhsil sistemində idarəetmənin
informasiyalaşdırılması; - kadr potensialının gücləndirilməsi; - normativ-hüquqi bazanın təkmilləşdirilməsi
və s. Dövlət Proqramının həyata keçirilməsi
nəticəsində təhsil müəssisələrinin
İKT avadanlığı ilə təminat göstəricilərinin
köklü şəkildə yaxşılaşması, bütün
təhsil müəssisələrində hər bir şagirdə
düşən kompüter nisbətinin ən azı 20:1-ə çatdırılması,
bütün fənlər üzrə elektron tədris və metodiki
resursların yaradılması, yeni təlim formaları, xüsusən
distant təhsilin tətbiqinin genişləndirilməsi, bütün
təhsil müəssisələrini əhatə edən ölkədaxili
korporativ və yüksəksürətli İnternet şəbəkəsinə
çıxış imkanının yaradılması, İKT-nin
təhsilin idarə olunmasına səmərəli
inteqrasiyasının təmin edilməsi, təhsilin
idarə olunmasının və monitorinqinin
səmərəliliyinin artırılması, vahid
təhsil portalının formalaşdırılması
və digər məsələlər həllini tapacaqdır. ölkəmizdə peşəkar polis kadrlarının
hazırlığı ilə məşğul olan Polis
Akademiyasının pedaqoji kollektivi bu vəzifənin
vacibliyini tam məsuliyyəti ilə dərk edir.
Azərbaycan Respublikasının Prezidenti cənab İlham
Əliyevin "2008-2012-ci illərdə Azərbaycan
Respublikasında təhsil sisteminin informasiyalaşdırılması
üzrə Dövlət Proqramı"nın təsdiq
edilməsi haqqında sərəncamını
rəhbər tutaraq daxili işlər orqanları sistemi
üçün ali təhsilli kadr hazırlayan Polis Akademiyasında
həyata keçirilən islahatlar tədrisin məzmun və
formaca təkmilləşdirilməsinə, müasir informasiya
və kommunikasiya texnologiyalarının tətbiqinə,
tədris prosesində elmi-texniki nailiyyətlərdən
istifadə olunmasına geniş şərait yaradır. Dövlət Proqramında əsas
istiqamətlərdən biri də elektron
dərsliklərin, dərs vəsaitlərinin, elektron
kitabxanaların yaradılması, informasiyalaşdırma
prosesinin elmi-metodik təminatı
məsələlərinin əhatə edilməsidir. Bu
istiqamətdə də son illərdə akademiyada xeyli iş
görülmüşdür. Tədris proqramlarına, mühazirələr
toplusuna, dərs vəsaitlərinə, sxemlər albomuna
aidiyyəti üzrə rəylər və Təhsil Nazirliyi
tərəfindən müvafiq nəşr hüququ-
"qrif" alındıqdan sonra nəşr olunur və
onların elektron variantları akademiyanın elektron
kitabxanasının fonduna daxil edilir. Hazırda akademiyanın
ümumi kitabxanasında istifadə olunan kompüterlər ADSL
sistemi ilə yüksək sürətli İnternet şəbəkəsinə
qoşulmuş, onların yaddaşına Azərbaycan
Respublikasının, Rusiya Federasiyasının və
digər inkişaf etmiş Avropa dövlətlərinin
qanunvericilik və normativ-hüquqi aktları bazası daxil
edilmişdir ki, bunlar da mütəmadi olaraq yeni normativ aktlar,
qanunlar və qanunlara əlavələr qəbul
edildikcə yeniləşdirilir. Bu elektron bazadan akademiyanın
həm professor-müəllim heyəti, həm də müdavim
və dinləyiciləri tədris prosesində
səmərəli şəkildə istifadə edirlər. 90 il şərəfli yol keçmiş
Azərbaycan polisi informasiya və kommunikasiya texnologiyalarının
tətbiqi ilə bağlı bir neçə uğurlu
layihələrin iştirakçısı olmuşdur.
Hazırda təhsildə informasiya və kommunikasiya
texnologiyalarının tətbiqi ilə bağlı bir neçə
layihə üzərində işlər davam etdirilir. Bu cür
layihələrdən biri də akademiyada distant
təhsilə imkan verən telekommunikasiya və tədris
prosesinin mərkəzləşdirilmiş
videonəzarət sistemlərinin quraşdırılmasıdır. İnanırıq ki, dövlət başçısının
bu günlərdə imzaladığı tarixi sərəncamın
icrası və reallaşması nəticəsində
Azərbaycan təhsilində İKT-nin rolu və
əhəmiyyəti daha da artacaq, təhsil müəssisələrimizdə,
o cümlədən də Polis Akademiyasında informasiya
cəmiyyətinin tələblərini dərindən
bilən müasir təfəkkürlü gənc polis əməkdaşlarının
yetişdirilməsi sahəsində yeni-yeni
nailiyyətlər əldə ediləcəkdir. Səməd HüMBƏTOV, Polis Akademiyası DİO-da
idarəetmənin təşkili kafedrasının rəisi,
fizika-riyaziyyat elmləri namizədi
|