Oktyabrın 29-da Azərbaycan Respublikasının Təhsil Şurası ilə Bakı Pedaqoji Kadrların İxtisasartırma və Yenidənhazırlanma İnstitutunun (BPKİYİ) birgə təşkil etdikləri "Şagird nailiyyətinin qiymətləndirilməsi: nəzəri və təcrübi yanaşmalar" mövzusunda "dəyirmi masa" keçirildi. BPKİYİ-də təşkil olunmuş tədbirdə institutun rektoru, professor Asəf Zamanov çıxış etdi. Son dövrlərdə mövzu ilə bağlı institutda xeyli işlərin görüldüyünü qeyd edən professor Asəf Zamanov ənənəvi və müasir qiymətləndirmənin fərqli cəhətlərindən danışdı, qiymətləndirmə prosesinin təkmilləşdirilməsinə daim ehtiyac olduğunu vurğulayaraq problemin yeni mərhələsindən söhbət açdı. Sonra Təhsil Şurasının sədri, professor Əjdər Ağayev çıxış edərək keçirilən tədbirin əhəmiyyətindən danışdı. Mövzu ilə bağlı fikirlərini iştirakçılarla bölüşdürən şura sədri qiymətləndirmənin obyektiv aparılmasının vacibliyinə toxundu. Hər bir insan öz əməyinə və fərdi keyfiyyətlərə görə qiymətləndirilməlidir, fikrinə xüsusi önəm verən Təhsil Şurasının sədri prosesin fəlsəfəsinə də diqqət çəkdi. Təhsil Şurasının bu sahədə apardığı işləri iştirakçıların nəzərinə çatdıran Ə.Ağayev qiymətləndirmənin xüsusi proses olduğunu qeyd etdi. Həlli vacib olan məsələlərə aydınlıq gətirərək, lazımi tövsiyələrini verdi. Bakı Dövlət Universitetinin professoru Şahlar Əsgərovun "Biliyin qiymətləndirilməsinin yeni kriteriyası və şkalası" məruzəsindən sonra Azərbaycan Milli Konservatoriyası nəzdində Musiqi Kollecinin direktoru, professor Nazim Kazımov, Bülbül adına Baş Orta İxtisas Musiqi Məktəbinin direktoru, professor Nigar Əsgərova, Təhsil Nazirliyinin əməkdaşı Nəbi Mahmudov mövzu ilə bağlı çıxış etdilər. Maraqlı təkliflər səsləndi. 

Fazil İDRİSOĞLU