Dekabrın 25-də 6 nömrəli Bakı Peşə Liseyinin 40 illik yubileyi təntənəli qeyd edilib. Liseyin akt zalında keçirilən tədbirdə giriş sözü ilə çıxış edən liseyin direktoru Sahib Rüstəmov qonaqları və tədbir iştirakçılarını salamladıqdan sonra rəhbərlik etdiyi təhsil ocağının fəaliyyət yolundan söz açıb. ötən 40 il ərzində bu təhsil ocağını 58000 məzunun bitirdiyini və onların respublikanın iqtisadi inkişafında fəal iştirak etdiklərini qeyd edib. Hazırda tədris müəssisəsində təhsil alan 630 şagirdin təlim-tərbiyəsi ilə 124 mühəndis-pedaqoji işçinin məşğul olduğunu diqqətə çatdırıb. ümummilli lider Heydər Əliyev siyasətinin Azərbaycan iqtisadiyyatının və təhsilinin inkişafında misilsiz xidmətlərindən söz açan natiq həmin siyasətin bu gün Prezident İlham Əliyev tərəfindən uğurla aparıldığını yubiley iştirakçılarının nəzərinə çatdırıb. ümummilli lider Heydər Əliyevin əziz xatirəsi bir dəqiqəlik sükutla yad edilib.

Yığıncaqda çıxış edən təhsil naziri Misir Mərdanov mərasim iştirakçılarını salamlayıb, təhsil ocağının mühəndis-pedaqoji kollektivini, texniki işçilərini və şagirdlərini peşə liseyinin 40 illik yubileyi münasibətilə təbrik edib. Belə tədbirlərin keçirilməsində əsas məqsədin peşə liseylərinə, ümumilikdə peşə təhsilinə diqqəti artırmaqdan, bu sahədə çalışan işçiləri həvəsləndirməkdən ibarət olduğunu bildirib.

Peşə təhsilinin Azərbaycanda uzun illər müxtəlif səviyyələrdə diqqətdən kənarda qaldığını, peşə məktəblərinin əsasən ulu öndərin respublikaya rəhbərliyi dövründə inkişaf etdirildiyini qeyd edib. 1969-cu ildə Azərbaycanda 70-80 peşə məktəbinin fəaliyyət göstərdiyini, 1983-cü ildə bu rəqəmin 170-ə çatdırıldığını qeyd edən nazir, ulu öndər Heydər Əliyevin hələ 40 il bundan qabaq ölkənin inkişafında peşə təhsilinin rolunu gördüyünü və bu istiqamətdə uğurlu işlər həyata keçirdiyini toplantı iştirakçılarının nəzərinə çatdırıb.

Misir Mərdanov Heydər Əliyev siyasətini bu gün layiqincə həyata keçirən Prezident cənab İlham Əliyevin peşə təhsilinə xüsusi önəm verdiyini, "Azərbaycan Respublikasında texniki peşə təhsilinin inkişafı üzrə Dövlət Proqramı (2007-2012-ci illər)"nın təsdiq edilməsi haqqında 3 iyul 2007-ci il tarixli sərəncam imzaladığını yubiley iştirakçılarının diqqətinə çatdırıb. Prezidentin bu sərəncamından sonra bu sahədə müəyyən addımların atıldığından söz açan nazir 2010-cu ildə Prezidentin rəhbərliyi altında bu sahədə daha uğurlu nailiyyətlər qazanılacağına əmin olduğunu bildirib.

Hələlik peşə təhsilini inkişaf etdirmək üçün daxili imkanlardan səmərəli istifadə olunmasının vacibliyini diqqətə çatdıran nazir peşə təhsili müəssisələri rəhbərlərinə işlərini yaxşı qurmağı tövsiyə edib.

Peşə təhsili müəssisələrinin inkişafına və normal fəaliyyət göstərməsinə Təhsil Nazirliyinin həmişə kömək etdiyini vurğulayan nazir, Namiq Məmmədovun Texniki peşə təhsili şöbəsinə müdir təyin olunmasından sonra bu sahədə böyük dönüş yarandığını açıqlayıb. Peşə təhsilinin nəzərdə tutulan səviyyəyə çatdırılması üçün uğurlu addımların atıldığını, "Azərsu Holdinq" peşə təhsili ilə bağlı bir layihə həyata keçirəcəyini və digər layihələrin reallaşdırılacağını qeyd edib.

Təhsil naziri yaxın zamanlarda Lənkəranda və Ağstafada yeni peşə mərkəzlərinin yaradılması ilə bağlı layihələrin həyata keçiriləcəyini və belə layihələrin Quba və Xaçmaz rayonları üçün də nəzərdə tutulduğunu, bu layihələrin reallaşdırılmasına beynəlxalq təşkilatların kömək edəcəyini bildirib.

Uzun illər peşə təhsili müəssisələri üçün dərsliklərin olmadığını qeyd edən nazir bu problemi aradan qaldırmaq məqsədilə dövlətin qayğısı və şöbənin təşəbbüsü ilə 8 adda dərslik hazırlandığını və hazırda çap edildiyini diqqətə çatdırıb.

Misir Mərdanov bu təhsil ocağında Xəzər dəniz Gəmiçiliyi üçün ixtisaslı kadrların hazırlandığını və məzunların kursu başa vurduqdan sonra işlə təmin olunduqlarını müsbət hal kimi qiymətləndirib.

Nazir peşə liseyinin kollektivini və tədbir iştirakçılarını qarşıdan gələn 31 dekabr Dünya Azərbaycanlılarının Həmrəyliyi Günü və Yeni il bayramı münasibətilə təbrik edib.

Sonda Misir Mərdanov məktəbin işçilərindən bir neçəsinə nazirliyin "Qabaqcıl təhsil işçisi" döş nişanını və Fəxri fərmanını təqdim edib. 

Nizami MİRZƏ