|
Dekabrın 29-da Təhsil Nazirliyində 2009-cu ilin
yekunlarına dair mətbuat konfransı keçirildi.
Azərbaycan Respublikasının təhsil naziri Misir
Mərdanov konfransda iştirak edən kütləvi
informasiya vasitələri nümayəndələrini
salamlayaraq onları 31 Dekabr - Dünya
Azərbaycanlılarının Həmrəyliyi Günü və Yeni il
bayramı münasibətilə təbrik etdi.
Sonra təhsil naziri jurnalistlərin diqqətini
2009-cu ilin yekunlarına dair təqdimata cəlb
etdi. ölkə Prezidenti cənab İlham Əliyevin
təhsil sahəsinə daim xüsusi diqqətlə
yanaşmasından, təhsil işçilərinə xüsusi qayğı
göstərməsindən söz açan nazir bununla bağlı ilin
ən mühüm hadisələrini diqqətə çatdırdı.
Prezidentin təhsilin ayrı-ayrı sahələrinin
inkişafı üzrə imzaladığı sərəncamlar, yüksək
dövlət mükafatları, təltiflər, fəxri adlar və
fərdi təqaüdlərə layiq görülmüş təhsil işçiləri,
eləcə də istedadlı uşaq və gənclər haqqında
məlumatların əks olunduğu slaydlar jurnalistlərə
təqdim olundu.
Təhsil naziri Misir Mərdanovun mətbuat
konfransındakı təqdimatında daha sonra bu
sahənin iqtisadiyyatı, informasiyalaşdırılması,
kadr təminatı, qiymətləndirmə sistemi, məktəb
infrastrukturunun inkişafı, ixtisasartırma
təhsili, məktəbəqədər, orta ümumtəhsil, orta
ixtisas, ali və məktəbdənkənar təhsil,
dərsliklərlə təminat, kurikulum islahatı,
beynəlxalq olimpiadalar və idman yarışlarında
əldə olunmuş nailiyyətlər, beynəlxalq əməkdaşlıq
sahəsində görülən işlər və s. haqqında ətraflı
məlumat verildi. Aydın oldu ki, təhsilə ayrılan
büdcə 2003-cü illə müqayisədə 5 dəfədən çox
artaraq 2009-cu ildə 1,3 milyard manat təşkil
edib. Son 5 ildə təhsil işçilərinin əməkhaqqı 5,
tələbələrin təqaüdü 10 dəfə artıb. Bu illərdə
Azərbaycanda 450 min şagird yerlik 2 minədək
yeni məktəb binası tikilərək istifadəyə verilib.
2009-cu ildə 68 yeni məktəb binası və əlavə
korpus tikilib, 28 məktəb, 10 körpələr evi-uşaq
bağçası əsaslı təmir olunub və s.
Sonra nazir jurnalistlərin təhsilin müxtəlif
sahələri üzrə verilən çoxsaylı suallarını
cavablandırdı. Bununla da 2009-cu ilin
yekunlarına dair mətbuat konfransı başa çatdı.
Hicran ƏKBƏROVA |
