Martın 6-da ADU-nun rektoru, millət  vəkili, professor Səməd Seyidov  Liviyanın Azərbaycana  yeni təyin olunmuş fövqəladə və səlahiyyətli səfiri Saad Mustafa Mucbir ilə  görüşüb. Səfir bu günlərdə Azərbaycan Respublikası Prezidentinə öz etimadnaməsini təqdim etdiyini bildirib. Ölkəmizə gəlməyindən özünü çox  xoşbəxt hiss edən səfir 2000-ci ilin iyulunda mərhum Prezident Heydər Əliyevlə görüşünü xatırladıb.

Görüşdə  regional məsələlər, bölgədə və dünyada baş verən hadisələr ətrafında fikir mübadiləsi aparılıb. Azərbaycanla Liviya arasında münasibətlərin yüksək səviyyədə olduğu vurğulanıb.

ADU-nun rektoru Səməd Seyidov bildirib ki, Liviya bizim üçün dost  və yaxın bir ölkədir.  Bütün beynəlxalq təşkilatlarda Liviya Azərbaycanın ədalətli mövqeyini həmişə  dəstəkləyib. O, ADU-nun Qərb universitetləri, həmçinn Çin, Koreya, İndoneziya, Malayziyanın müxtəlif ali məktəbləri ilə  əlaqələrinin genişləndiyini və bu əlaqələrin Liviya universitetləri ilə də yaradılmasının, müəllim-tələbə mübadiləsinin  məqsədəmüvafiq olduğunu vurğuladı. 

Sonda Səməd Seyidov Liviyanın Azərbaycana təyin olunmuş səfirini mühazirə  oxumaq üçün universitetə dəvət etdi. Səfir Saad Mustafa Mucbir bu təklifi məmnunluqla qəbul etdi.  

Şakir CƏFƏROV