Martın 11-12-də Budapeşt və Vyanada Boloniya prosesinə qoşulmuş ölkələrin təhsil nazirlərinin konfransı keçirilmişdir.

1999-cu ildə əsası qoyulan Boloniya prosesinin 10 illik yubileyinə həsr edilmiş konfransda prosesə qoşulmuş 47 ölkənin təhsil nazirləri qatılmışlar. Konfransda Azərbaycanı təhsil naziri Misir Mərdanovun rəhbərliyi ilə Bakı Slavyan Universitetinin rektoru Kamal Abdulla, Təhsil Nazirliyinin Ali və orta ixtisas təhsili şöbəsinin müdiri İlham Mustafayev, Beynəlxalq əlaqələr şöbəsinin baş məsləhətçisi Azad Axundov və Bakı Slavyan Universitetinin 3-cü kurs tələbəsi Hikmət Babayevdən ibarət nümayəndə heyəti təmsil etmişdir.

İki gün davam edən konfransda Boloniya prosesinin əsas hədəfi olan Avropa Ali Təhsil Məkanı və proses çərçivəsində Avropada həyata keçirilən təhsil islahatları ətrafında fikir mübadiləsi aparılmış, çıxış və məruzələr dinlənilmişdir.

Konfransda Boloniya prosesinin şərtlərini yerinə yetirən Qazaxıstan Avropa məkanında ən nüfuzlu təhsil prosesinə yeni üzv kimi qəbul edilmişdir.

Təhsil naziri Misir Mərdanov AzərTAc-ın xüsusi müxbiri ilə söhbətində bildirmişdir ki, 1999-cu ildə start götürən Boloniya prosesinin əsas mahiyyəti Avropada ümumi ali təhsil məkanının yaradılmasına nail olmaqdır. Avropa Şurasının Mədəniyyət Konvensiyasını imzalayan və Boloniya prosesinin prinsiplərini öz təhsil sisteminə tətbiq etməyə hazır olan bütün ölkələr bu prosesə qoşula bilər. Avropaya inteqrasiyanı əsas hədəf götürən Azərbaycan artıq 2005-ci ildən Boloniya prosesinə qoşulmuşdur. Proses çərçivəsində Avropada ali təhsil proqramlarının yaxınlaşdırılması, yeni tədris modullarının hazırlanması, tələbə və müəllim heyətinin mobilliyinin təmin edilməsi, biliyin qiymətləndirilməsində kredit sisteminə keçid və digər məsələlər ön planda dayanır.

Təhsil Nazirliyi Boloniya prosesinin Azərbaycanda uğurla həyata keçirilməsi üçün Avropa Şurasının Mədəniyyət, Elm və Təhsil Komitəsi, YUNESKO və Avropa İttifaqının Təhsil Komissiyası ilə sıx əməkdaşlıq edir. Azərbaycan Ümumavropa təhsil sisteminə inteqrasiyanın tərkib hissəsi olan Boloniya prosesində iştirakını bundan sonra da uğurla davam etdirəcəkdir.

Qeyd edək ki, konfransın sonunda Budapeşt-Vyana Bəyannaməsi qəbul edilmişdir. Boloniya prosesinə qoşulmuş ölkələrin təhsil nazirlərinin növbəti, sayca yeddinci konfransı 2012-ci ildə Rumıniyanın paytaxtı Buxarestdə keçiriləcəkdir.  

AzərTAc