Xəbər verildiyi kimi, fervalın 23-də BMT Baş Məclisinin 64-cü sessiyasında təşkilatın üzvü olan dövlətlərin nümayəndələri Azərbaycanın təşəbbüsü ilə martın 21-nin "Beynəlxalq Novruz Günü" kimi qeyd olunması barədə qətnaməni yekdilliklə qəbul etmişlər.

Xalqımızın ən əziz bayramlarından olan Novruzun dünyada təbliğini qarşısına məqsəd qoyan Azərbaycan Dövlət Teleqraf Agentliyi - AzərTAc milli mədəniyyətimizin və adət-ənənələrimizin tarixində mühüm yer tutan qədim bayramımızın ABŞ-da tanınması üçün mart ayında Kaliforniya ştatının məktəblərində "Novruz" mövzusunda xüsusi dərslərin keçilməsi təşəbbüsü ilə çıxış edib. Agentliyin ABŞ üzrə nümayəndəliyinin Kaliforniya ştatının Monterey yarımadasının Təhsil Dairəsi ilə birgə reallaşdırdığı layihəyə əsasən, yerli məktəblərdə Novruz çərşənbələri ilə bağlı təqdimatlar keçirilib.

AzərTAc-ın xüsusi müxbiri Şəfəq Mehrəliyeva məktəblilər qarşısında çıxış edərək, Novruz bayramının təkcə Azərbaycanda deyil, həm də Balkanlar, Orta Asiya, Yaxın Şərq bölgələrində dünyanın 300 milyon əhalisi tərəfindən qeyd edildiyi barədə danışıb. Azərbaycanda Bahar bayramının xüsusi təmtəraqla keçirildiyini qeyd edən jurnalist, azərbaycanlı uşaqların sevimli Novruz ənənələrini amerikalı məktəblilərlə bölüşüb. Məktəblilərə Azərbaycan haqqında, ölkəmizin yerləşdiyi coğrafi məkan, onun iqlimi, paytaxtı və əhalisi barədə də ətraflı məlumat verilib. Amerikalı məktəblilər "Novruz" dərslərindən öyrəndiklərini təhlil edərək yumurta boyanması, papaq atılması, təmizlik işlərinin görülməsi, bayramda ailə üzvlərinin bir yerə toplaşması kimi ənənələrin ABŞ-ın Pasxa, Şükranlıq, Hallovin kimi bayramlarında da tətbiq edildiyini bildiriblər. Məktəblilər onlara hədiyyə edilən Novruz xonçasındakı milli şirniyyatlarımızdan məmnuniyyətlə dadıblar.

Monterey yarımadasındakı Marina şəhərinin ibtidai məktəbində keçilən "Novruz" dərslərinin birində şəxsən iştirak edən Montereyin vitse-meri Nənsi Selfric Şəfəq Mehrəliyevaya məktəblilərin dünya haqda biliklərinin artmasına verdiyi töhfəyə görə minnətdarlığını bildirib. Amerikalı məktəblilərin Azərbaycan haqqında öyrəndikləri məlumatların qarşılıqlı mədəni anlaşmanın inkişafına xidmət etdiyini vurğulayıb.

AzərTAc-ın nümayəndəsi vitse-mer Nənsi Selfricə Novruz hədiyyəsi olaraq Azərbaycan ipəyinin rəmzi sayılan Şəki kəlağayısı hədiyyə edib.  

Y.ƏLİYEV