Son illər poeziyamızda yeni bir ədəbi hadisə
kimi N.Həsənzadənin "Nizami" poeması diqqəti
cəlb edir. Bu maraqlı əsərin yazılması ilə
əlaqədar müəllifin özünəməxsus bir səmimiyyətlə
etirafı çox maraqlıdır.
"Gənc dostum Nizami Cəfərovun 40 yaşı tamam
olurdu. Məni dəvət etmişdi. Bir şeirlə getmək
istədim. İlk gəncliyindən ürəyimdə ayrıca yeri,
bənzərsiz gülüşləri olan bu insanın həyatı çox
da nikbin keçməyib. Mərhum atası doğma
torpaqlarından zorla deportasiya edilənlərdən
olub". Elə bu müqəddimədən aydın olur ki,
müəllifin əsərin baş qəhrəmanı seçdiyi Nizami
Cəfərovun mənsub olduğu ailə Ermənistandan
köçürülən və o vaxtdan (1940-50-ci illər) Qazax
torpağında məskunlaşan sadə bir türk ailəsidir.
Poemanın ayrı-ayrı kiçik fəsillərində biz əsas
qəhrəmanın körpəlikdən bugünkü həyat və
fəaliyyətinə qədərki çətin və uğurlu yolun
şahidi oluruq. Oxucuda tam təsəvvür yaransın
deyə, şair öz qəhrəmanının ən ümdə cəhətlərini -
vətənsevərliyini, milli kök - soy, dövlətçilik
və türkçülük ideyalarına bağlılığını önə çəkir
və daha çox bu cəhətləri oxucusunun nəzərində
canlandırmağı vacib sayır.
Şair taleyüklü məsələlərdə öz qəhrəmanının
tutduğu mövqeyə qəlbən inanır və bundan böyük
qürur hissi keçirir, çünki ölkənin, Vətən
torpağının ağır məqamlarında çevik tərpənmək,
səbatlı mövqe və siyasət yeritmək ən ümdə
məsələdir. Seyrçi, müşahidəçi qalmaq heç kəsə
şərəf gətirməz və millət öz yerində sayar.
Dünyanın güc sahibi olan dövlətlər laqeyd
qalanda, biganə yanaşanda, təzadlar,
ziddiyyətlər daha da kəskinləşəndə azsaylı
xalqlar, tayfalar minbir müsibətlə üz-üzə qalır,
əzilib təhqir olunurlar. Elə buna görədir ki,
şair öz hiddətini bu misralarda sərrast ifadə
edir:
...İndi bu dünyanın vardı qulağı,
Qarabağ deyəndə, eşidə bilmir...
Poemanın, demək olar ki, bütün hissələrində
Azərbaycanın mənfur düşmənlərinə qarşı ittiham
və qəzəb hissi özünü aydın göstərir. "Qələmi
qılıncdan kəsərli" kimi təqdim olunan əsər
qəhrəmanı Moskvanın "Qafqaz töhfəsi", Yerevanın
"İblis hiyləsi"nə qarşı çıxır, millət vəkili
olaraq bütün siyasi və mədəni tədbirlərdə
manqurtluğu, milli mənəvi aşınmaları xalqın
bəlası hesab edir, sözünü ən ali kürsülərdən
deməyi əsl vətəndaşlıq borcu bilir.
Əsərdə Nizami obrazı əsl türk vətəndaşı, milli
patriot, türk və islamçılıq ideoloji, kəskin və
dəyişilməz mövqe sahibi kimi xarakterizə
olunur. Oxucu bədii qəhrəmanın simasında həm də
bir fəlsəfi idraklı filoloq obrazı görür.
Şairin öz həyat və yaradıcılıq yolu yaxından
tanıdığı və sevdiyi qəhrəmanın - Nizaminin həyat
və sənət kredosu ilə bir vəhdət təşkil edir.
Alim Nizaminin dil-ədəbiyyat haqqında düşüncə və
elmi-nəzəri mülahizələri ilə şair Nizaminin
ədəbi-estetik baxışları bir-birini gözəl
tamamlayır. Bunu poemanın bir çox yerlərində
aydın hiss edirik:
Biz üç əlifbada, bir dildə yazdıq,
"Əski"də, "latın"da, "kiril"də yazdıq.
Bu nəsli o nəslə qarşı qoydular,
Ayırıb qəsd ilə qarşı qoydular.
Nizami Cəfərov özünün bütün dilçiliyə,
ədəbiyyata dair yazdıqları əsərlərdə bu cür
taleyüklü məsələlərdən ürəkağrısı ilə çox
yazmışdır.
Bu sahədəki bəzi elmi əsərlərini yada salmaq,
bizcə, yerinə düşər: "Şəxsiyyətin strukturunda
XX yüzilin "böyük türklüyü", "Kitabi-Dədə
Qorqudun dili", "Ümumtürk ədəbi dil",
"Azərbaycan etnik-mədəni sisteminin yaranmasında
qıpçaq türklərinin rolu", "Bir daha Füzulinin
dili haqqında", "Azərbaycan dili, türk dili,
yoxsa Azərbaycan türkcəsi", "Ümumtürk ədəbi
dili yaratmaq mümkündürmü?" və s. elmi
məqalələri dediyimizə sübut ola bilər.
Nəriman Həsənzadənin böyük ürək və səmimiyyətlə
yazdığı "Nizami" poeması çağdaş dövrümüzün sadə
və müdrik insanı Nizami Cəfərov haqqında qələmə
alınan lirik bir salnamədir. Burada gənc və
müdrik alimin, çox qabil dilçi və ədəbiyyatşünas
- tənqidçinin həyat və fəaliyyətindən yığcam,
lakin məna dolu səhifələrlə razılaşırıq.
Poemada Nizaminin qeyri-adi istedadına,
səmimiyyət və mərdanəliyinə, söz sərrafı kimi
hazırcavablığına, elmi məntiqi və təfəkkürünə,
universal bilik sahibi olmasına dair xeyli
misallar gətirmək olar.
Şair poemasında gənc istedad sahibi tək
özünəməxsus zirvələrə çatmış Nizamini həm
filoloq, həm türkoloq, həm də əsl vətəndaş,
böyük hərflə yazılan İnsan kimi səciyyələndirir.
Onun sadəliyini, humanist, xeyirxah əməllərini
və eyni zamanda fikrindən, əqidəsindən
dönməzliyini, ağayana və məğrurluğunu da xüsusi
nəzərə çarpdırır.
"Şeyxim, ey Nizami, şairlər şahı" - dey
ərək qiymətləndirdiyi XII əsrin böyük
sənətkarını vəsf edən N.Həsənzadə haqlı olaraq
qeyd edir ki, hörmətli oxucu nəzərə almalıdır
ki, müasirim Nizamini dahi sələfi ilə müqayisə
etmirəm. Sadəcə, bu günün Nizamisi özünəməxsus,
yüksək xüsusiyyətləri - idraki, təfəkkürü,
qeyri-adi istedadı və vətəndaşlıq mövqeyi ilə
yaşıdlarından və ümumiyyətlə, müasirlərindən
xeyli dərəcədə zirvədə dayanır və gəncliyə örnək
bir şəxsiyyət səviyyəsindədir. Onlarca alimlərin
yetişməsində müstəsna xidməti bu fikri bir daha
təsdiq edir.
Görkəmli şairin poemasındakı bu misralar da əbəs
yerə deyilmir:
Dünyaya Bəhmənyar və Tusi gəldi,
İndi də onların varisi gəldi.
Mahmud Qaşqarinin türkçü qələmi,
Sənin əlindədi indi, Nizami!...
Poemanın qəhrəmanı şairin fikrincə, həm istedadı,
həm də zəhməti, çalışqanlığı ilə yüksək
kürsüləri fəth edə bilib. Ulu öndər Heydər
Əliyevin onun həyatındakı mühüm rolunu şair incə
və yığcam bir formada, özünəməxsus sadəlik, müdrik
misralarda canlandıra bilmişdir:
"O da Görücüydü, insanı bəzən,
Yaxşı tanıyırdı: üzdən yox, içdən"
"Böyük bir alimə vəzifə verdim,
Atatürk Mərkəzi! - get, işlə, dedim"
"İstedad, bilirəm, şərtdi şübhəsiz,
Şərtdi, - istedadı görmək özü də"
Nizaminin təmkinli, ciddi görünüşü,
hazırcavablığı, aydın məntiqi, təsirli nitqi,
eyni zamanda yüksək mənəvi cəhətləri şair
tərəfindən bir psixoloq - müəllim kimi çox
yerində və tutarlı epizodlarda ifadə olunmuşdur.
Əsərdəki bütün bədii təsvir vasitələri Nizaminin
dolğun, bitkin obrazını yaratmaqda poetik
yardımçıdır. Bütün bunlar, şübhəsiz ki, bədii
obrazın mənəvi dünyasının yeni çalarlarını üzə
çıxarır.
Poemada Nizaminin bütün mənəvi keyfiyyətlərinin,
o cümlədən ədəbiyyat, ictimai xadim kimi
yaradıcılıq fəaliyyətinin çoxtərəfli
cəhətlərinin şahidi olmuruq. Şair buna ehtiyac
da duymamışdır. Çünki qarşıya belə məqsəd
qoyulmamışdır, müəllif ilk dəfə olaraq onun bir
ziyalı - türk obrazını lirik ricətlərlə, təbii
və səmimi şəkildə verməyə çalışmış və bunu
ustalıqla bacarmışdır.
Əmirxan XƏLİLOV,
filologiya elmləri doktoru |