Ölkəmizdə pedaqoji kadrların hazırlanmasında böyük xidmətləri olan Azərbaycan Müəllimlər İnstitutunun ötən il 80 illik yubileyi qeyd olunub. Bu münasibətlə və təhsildəki xidmətlərinə görə institutun bir qrup əməkdaşı Azərbaycan Respublikası Prezidentinin sərəncamları ilə orden və medallarla, fəxri adlarla təltif olunub. Martın 19-da institutda təltif olunanlara mükafatların təqdim edilməsi mərasimi keçirilib.

Tədbirdə təhsil naziri Misir Mərdanov iştirak edib. Mərasimi giriş sözü ilə açan AMİ-nin rektoru, professor Aqiyə Naxçıvanlı ötən illər ərzində institutun fəaliyyətindən danışıb.

Nazir Misir Mərdanov çıxış edərək ölkədə təhsilin inkişafında, aparılan təhsil islahatlarında, pedaqoji kadrların hazırlanmasında Azərbaycan Müəllimlər İnstitutunun rolunu yüksək qiymətləndirib.

Ölkə Prezidentinin apardığı məqsədyönlü daxili və xarici siyasət nəticəsində respublikada gedən sürətli inkişafdan, təhsilimizin dünya təhsilinə inteqrasiyası sahəsindəki uğurlarından danışan nazir müəllimlərin əməyinə yüksək qiymət verdiyinə görə təhsil işçilərinin Prezident İlham Əliyevə həmişə minnətdar olduqlarını bildirib. Qeyd edib ki, ötən il Prezidentin sərəncamları ilə AMİ-nin rektoru, professor Aqiyə Naxçıvanlı "Şöhrət" ordeni, İctimai fənlər kafedrasının müdiri, professor Vaqif Piriyev "Əməkdar elm xadimi" fəxri adı ilə, həmçinin bir qrup əməkdaş "Tərəqqi" medalı və "Əməkdar müəllim"  fəxri  adı  ilə  təltif  olunublar. Sonra mükafatlar sahiblərinə təqdim edilib.

Sonda professor Aqiyə Naxçıvanlı diqqət və qayğıya görə rəhbərlik etdiyi institutun kollektivi adından ölkə başçısına təşəkkürünü bildirib. 

Nizami MİRZƏ