Fransanın
paytaxtı Paris şəhərindəki "Petra" nəşriyyatında
"Nazim Hikmət: irs və modernizm" adlı kitab nəşr
olunmuşdur. Fransız dilində çap olunmuş kitabda
görkəmli türk şairi, dramaturq və ictimai xadim
Nazim Hikmətin həyatı və yaradıcılığına aid
məqalələr toplanmışdır. Fransa, Türkiyə,
Almaniya, Polşa, İspaniya alimlərinin
məqalələrinin yer aldığı topluda Naxçıvan Dövlət
Universitetinin rektoru, akademik İsa
Həbibbəylinin "Nazim Hikmət Azərbaycanda" adlı
məqaləsi də verilmişdir. Məqalədə şairin
Azərbaycanla, habelə Azərbaycan yazıçıları və
şairləri ilə əlaqələrindən bəhs olunur.
Akademik İsa Həbibbəyli ilk şeirlər kitabı
1928-ci ildə Bakıda nəşr olunan, Azərbaycan
xalqının və ədəbiyyatının yaxın dostu Nazim
Hikmətin yaradıcılığında Azərbaycan mövzusu,
azərbaycanlı müəlliflərin şair-dramaturqla bağlı
tədqiqatları haqqında elmi qənaətlərini
Azərbaycan-türk ədəbi əlaqələrinin fonunda
təqdim etmişdir. Kitabda məqalə müəllifinin
təqdim etdiyi Nazim Hikmətin Azərbaycan
yazıçıları ilə əlaqələrini əks etdirən 3
fotoşəkil də öz əksini tapmışdır.
"Nazim Hikmət: irs və modernizm" kitabını
tanınmış fransız alimləri Mişel Bozdəmir və
Timour Muhidine çapa hazırlamışlar. Timour
Muhidinenin kitaba yazdığı ön sözdə görkəmli
türk şairinin yaradıcılığındakı bəşəri
dəyərlərdən, humanizm ideyalarından və
mübarizlik ruhundan, onun dünya ədəbiyyatındakı
yerindən bəhs olunur. Tərtibçilərdən professor
Mişel Bozdəmir həm də yeni dövr
Azərbaycan-Fransa əlaqələrinin inkişafına mühüm
xidmətlər göstərən görkəmli alim kimi tanınır.
Ümid edirik ki, yeni nəşr görkəmli
şair-dramaturq Nazim Hikmətin simasında XX əsr
türk ədəbiyyatının Avropa oxucularına daha geniş
təqdimatında böyük rol oynayacaq.
Mehriban SULTAN |