Naxçıvan Dövlət Universitetində Azərbaycanda ilk
dəfə olaraq universitetdaxili videodərs
keçirilmişdir. Memarlıq və mühəndislik
fakültəsində keçirilən "açıq dərs" videobağlantı
vasitəsi ilə rektorluqda izlənilmişdir. Dərsdən
öncə universitetin rektoru, akademik İsa
Həbibbəyli çıxış edərək tədbirin əhəmiyyətindən
danışmış, muxtar respublika rəhbərliyinin
qayğısı ilə illər öncə yeni texnologiyanın
tətbiqinə başlanıldığını, bunun dünya elminə
inteqrasiya istiqamətində öz bəhrələrini
verdiyini vurğulamışdır.
Universitet müasir kompüter dəstləri, elektron
lövhələr, proyektorlar və digər yeni
avadanlıqlarla təchiz olunmuş,
informasiya-kommunikasiya texnologiyalarının
mənimsənilmiş, 5 il bundan öncə həyata keçirilən
və ənənəvi hal alan "Elektron Naxçıvan" layihəsi,
videodərs və videokonfranslar təşkil olunmuş,
dünyanın ən məşhur elm, tədris ocaqları ilə
canlı ünsiyyət yaradılmışdır. Qeyd olunmuşdur ki,
bu ali məktəbdə CİSCO texnologiyaları əsasında
yaradılan "Wi-FI" kampus İnternet şəbəkə
sisteminin qurulması hesabına tədris korpusları
ilə yanaşı, universitetin 110 hektarlıq
ərazisində simsiz sürətli İnternet bağlantısı
daha geniş elmi əlaqələr qurmağa imkan verir.
Sonra videodərs başlamışdır. Videodərs zamanı
Səyyad Vəliyevin memarlıq və mühəndislik
fakültəsinin "Yol hərəkətinin təşkili" ixtisası
üzrə II kurs tələbələrinə "Çarxqoru - sürgüqoru
mexanizminin vəzifəsi, quruluşu və əsas
detalları" mövzusunda mühazirəsi izlənilmişdir.
Dərs prosesində slaydlardan, əyani vəsaitlərdən
istifadə olunmuşdur. Videodərs bitdikdən sonra
qarşılıqlı müzakirə aparılmış, videodərs
pedaqoji və texniki cəhətdən qənaətbəxş hesab
olunmuşdur.
NDU-nun rektoru, akademik İsa Həbibbəyli, tədris
işləri üzrə prorektor, əməkdar elm xadimi Hüseyn
Həşimli, tərbiyə işləri üzrə prorektor, fəlsəfə
elmləri doktoru Məmməd Rzayev, beynəlxalq
münasibətlər və xarici dillər fakültəsinin
dekanı Qurban Qurbanlı gələcəkdə videodərslərin
daha keyfiyyətli təşkili üçün dəyərli tövsiyələr
vermişlər.
Mehriban SULTAN |