İnsan rəhmətə gedəndə deyirlər: "Dünyasını dəyişdi, haqq dünyaya getdi".

Bu belədir. Düzdür. Haqdır.

Lakin

Düşünürəm, bu dünyada ləyaqətlə, uzun və mənalı ömür sürən, böyük bir ailəyə rəhbərlik edən, öz ağıllı məsləhətləri, müdrik nəsihətləri, təmkini, maddi və mənəvi köməyi ilə çoxlarına dayaq olan bir insanın bu dünyadakı həyatı haqq deyilmi?!

Məgər bir nəvənin, nənəsinin cənazəsi önündə dərin hüznlə baş əyib məhəbbət və hörmət rəmzi olan duruşu haqq deyilmi?!

Qürur hissi ilə seyr edirəm, hər insana qismət olmayan bu görüntünü.

Həmidə xanım - əsl Azərbaycan xanımı.

Min məna vardı bir baxışında.

Böyük bir həyat məktəbi idi Həmidə xanım.

Dünyasını dəyişdi, lakin bu dünyada dərin iz qoyub getdi.

Bir mütəxəssis, bir rəhbər kimi neçə-neçə gənclərə həyata vəsiqə verdi. Professor Çingiz Cərullazadə və professor Nigar Cərulla qızı kimi cəmiyyətdə sayılıb-seçilən övladlar bəxş etdi. Ləyaqətli, əsl-nəcabətli, həm daxili, həm zahiri gözəl olan gəlini Hicran xanım və kürəkəni Müsəvvər bəy kimi kamil bir mütəxəssis, artıq hər biri bir şəxsiyyət kimi formalaşmış nəvələr, şirin nəticələr. Bütün bunlardır Həmidə xanımın bu dünyada qoyub getdiyi iz.

Mənim də boynumda onun haqqı var idi.

Deyə bilmərəm, o dünyada neçə və hansı mərhələlərdən keçir insanın ruhu. Bu mənim üçün bir sirdir. Əli Əleyhissəlamın kəlamı ilə desək: "Ən böyük sirr - ölümdür".

Bir şeyə əminəm ki, Həmidə xanım kimi bir şəxsiyyət üçün bu dünya da, o dünya da haqq dünyasıdır. 

Sona İBRAHİMOVA,
Bülbül adına Orta
İxtisas Musiqi Məktəbinin direktor müavini