Mayın 31-də Bakı Dövlət Universitetinin nəzdindəki  "Gənc istedadlar" liseyində "son zəng" mərasimi keçirildi. Tədbirdə BDU-nun rektoru, akademik Abel Məhərrəmov, məktəbin müəllim-şagird kollektivləri və qonaqlar iştirak edirdilər.

Tədbiri giriş sözü ilə açan akademik Abel Məhərrəmov məzunları təbrik edərək onlara gələcək həyatlarında uğurlar arzuladı. Qeyd etdi ki, lisey artıq ikinci ildir məzunlarını Azərbaycan cəmiyyətinə yola salır. Keçən ilki məzunların hamısının ali məktəblərə daxil olduğunu deyən A.Məhərrəmov həmin göstəricinin bu il də təkrar olunacağına ümid bəslədiyini bildirdi. Liseyin məzunlarının böyük tarixə malik olan BDU-nun adını və şərəfini hər yerdə ləyaqətlə daşıyacaqlarına inandığını vurğuladı. Dövlət tərəfindən təhsilə göstərilən qayğıdan söz açan natiq möhtərəm Prezidentimiz İlham Əliyevin rəhbərliyi altında ölkədə aparılan islahatları yüksək qiymətləndirərək məzunlara bu imkanlardan maksimum dərəcədə faydalanmağı tövsiyə etdi.

Sonra söz liseyin direktoru, kimya elmləri doktoru, professor Qasım Hüseynova verildi. O, qonaqları salamlayıb, gənclərə qarşıdan gələn imtahanlarda müvəffəqiyyətlər arzuladı. Q.Hüseynov liseyin fəaliyyət göstərdiyi müddətdə bir çox nailiyyətlər əldə etdiyini və bu uğurların gələcəkdə də davam edəcəyini bildirdi. Qeyd edildi ki, ötən ilki məzunlardan Rəcəb Rəcəbov qəbul imtahanlarında yüksək bal topladığı üçün Prezident təqaüdünə layiq görülüb. Bu uğurların bu il də təkrar olacağına inandığını söyləyən Q.Hüseynov liseyin müəllim heyətinə minnətdarlığını bildirdi.

Tədbirə Dövlət bayrağı və BDU-nun bayrağı gətirildikdən sonra Dövlət himnimiz səsləndi. Şagirdlərin hazırladıqları bədii hissədən sonra "son zəng" səsləndi.

Niyazi  RƏHİMOV