Bakıdakı 69 nömrəli körpələr evi-uşaq bağçasında "Əlvida, bağça, salam, məktəb" devizi altında  keçirilən mərasimdə hamıdan çox balaca məzunlar sevinirdi. Axı onlar ilk dəfə əllərinə çanta alıb, məktəbə yollanacaqlar. Geniş, işıqlı sinif otaqlarında bağçada tərbiyəçilərdən  öyrəndiklərini müəllimlərinin qarşısında  nümayiş  etdirəcəklər.

Budur, şarlarla,müxtəlif oyuncaqlarla, gül-çiçəklə bəzədilmiz musiqi zalında  aparıcılar Lamiyə və Yusif balaca məzunları məktəbə getməkləri münasibətilə təbrik edir və onları nümunəvi olmağa çağırır. Rəngarəng proqramla çıxış edən balaca fidanların  sevinci yerə-göyə sığmır. Tural və Turab  qardaşlarının söylədikləri  "Ana" və "Vətən", Əsmərin, Elnurun, Firdovsinin, Məhəmmədin, Ceyhunun, Rzanın ifa etdikləri "Müəllimlərimiz", "Azərbaycan", "Ana dili", "Günəş", "Təbiəti sevək", "Uşaqların bayramı", "Əlifba bayramı", "Əsgər gedirəm", "Mənim hüquqlarım", "Oxumaqdır, adətim" adlı şeirlər və mahnılar, Nərminin, Nigarın, Muradın   nümayiş etdirdikləri  milli rəqslər maraqla qarşılandı. "Xeyir və Şər" səhnəciyi iştirakçılarda  xoş ovqat yaratdı.

Bağçanın müdiri Solmaz Quliyeva, tərbiyəçilər  Lalə Əliyeva, Səidə Salayeva, Zemfira Ağayeva və valideynlər sevinclərini balaca məzunlarla bölüşdülər. S.Quliyeva qeyd etdi ki, bağçada məktəbəqədər, böyük,  orta və kiçik yaş qruplarının  hərəsindən bir olmaqla 4 qrup fəaliyyət göstərir. Bu il 25 uşaq  məktəbə  yola salınır. Onların hamısı məktəb təliminə hazırdır. Tərbiyəçi  Zemfira Ağayeva  "Ətraf  aləmlə tanışlıq" mövzusunda   "açıq məşğələ"lər keçirir. Tərbiyəçi Aida Əzizovanın iş təcrübəsindən  səmərəli  istifadə olunur. Bağçada  keçirilən  "açıq məşğələ"lərdən, sərgi və müsabiqələrdən, əl əməyi üzrə məşğələlərin təşkilindən, əqli tərbiyənin inkişafında  didaktik oyunların rolundan, musiqili-əyləncəli tədbirlərin  əhəmiyyətindən danışıldı. Bildirildi ki, ildə iki dəfə valideynlər üçün "açıq qapı" günü təşkil olunur. Valideyn şurasının sədri Şəfəq Teymurova balacaları tez-tez  Şəhidlər xiyabanına, Milli parka, Atəşgaha,şəhərin görməli və gəzməli yerlərinə ekskursiyaya aparır.

Mərasim başa çatsa da, musiqidən, rəqsdən doymayan balaca məzunlar meydanı tərk etmək istəmirdilər...

Sifai SƏFƏROVA