İyulun 12-də Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım  Əliyeva  Yunanıstanın Azərbaycandakı səfiri İoannis  Metaksas  ilə  görüşmüşdür.

Qonağı Fondda salamlayan Mehriban xanım Əliyeva  Azərbaycan  ilə Yunanıstan arasında əlaqələrin  bütün  sahələri əhatə etdiyini söylədi.  Fondun  fəaliyyətinin  çoxşaxəli olduğunu deyən Mehriban xanım  gələcəkdə əməkdaşlığın daha da genişlənəcəyinə ümidvar olduğunu bildirərək  qeyd  etdi  ki, Heydər Əliyev Fondu beynəlxalq əlaqələrə, birgə layihələrə hər zaman açıqdır.

Səfir İoannis Metaksas Bakıya gələndən sonra Fondun fəaliyyəti ilə daha yaxından tanış olduğunu bildirdi, qurumun həyata keçirdiyi layihələrin əhəmiyyətini vurğuladı. O, Prezident İlham Əliyevin və Mehriban xanımın Afinaya ötənilki səfərlərini xatırlatdı.

Görüşdə Heydər Əliyev Fondunun təşəbbüsü ilə inşa olunan internat-məktəblərdə alternativ enerji mənbələrindən istifadə məsələləri müzakirə olundu. Yunanıstan səfirliyi pilot layihə kimi Badamdar və Türkan qəsəbələrindəki iki internat-məktəbdə bu layihəni həyata keçirəcəkdir.

Səfir Fonda yodun çatışmazlığı diaqnostikasını aparan ultrasəs müayinəsi aparatı təqdim etdiyini bildirdi. Bu aparat ölkəmizin xəstəxanalarından birinə veriləcəkdir.  

AzərTAc