Azərbaycan Müəllimlər İnstitutu Əlavə təhsil
kabinetinin metodisti, pedaqoji elmlər namizədi
Yeganə Cəlilovanın və qabaqcıl məktəbşünas,
metodist Solmayə Əmirəliyevanın Zaqatala
filialında keçirdikləri dərslər regionun
pedaqoji kadrlarının yaddaşında uzun müddət
qalacaqdır. 4 gün davam edən təlim - məsləhət
məşğələlərində Zaqatala, Balakən və Qax
rayonlarından cəlb olunmuş 40 nəfər ibtidai
sinif müəllimi, 16 nəfər məktəbəqədər tərbiyə
müəssisələrinin tərbiyəçisi iştirak edib.
Məşğələ olduqca canlı və müdavimlərlə əks-əlaqə
şəklində qurulmuş, burada təlimin texniki
vasitələrindən, audio və video materiallardan,
qabaqcıl texnoloji nailiyyətlərdən bacarıqla
istifadə olunmuşdur. Dinləyicilər respublikada
ixtisasartırma təhsilinə verilən yeni
tələbatları dərindən mənimsəmiş, dünya təhsilinə
inteqrasiya məsələləri ilə tanış olmuş, ibtidai
siniflərdə uğurla tədris edilən kurikulumun
mahiyyətinə bələd olmuş, məktəbyaşlı uşaqlarla
aparılan tərbiyə işinin və onların məktəbə
hazırlanmasının nəzəri problemlərini
öyrənmişlər.
Təlim - məşğələlərin sonuncu günü AMİ-nin
əməkdaşları filialın pedaqoji kollektivi və
tədris - köməkçi heyəti ilə geniş tərkibdə
seminar-treninq keçirmişlər.
AMİ Zaqatala filialında növbəti tədris ilində
ixtisasartırma təhsilində fəal təlim
metodlarının tətbiqi və yayılması istiqamətində
böyük işlər görülməsi nəzərdə tutulur. Bu sahədə
AMİ-nin fəal dəstəyindən yararlanan filial
kollektivi və onun əlavə təhsil bölməsi
nailiyyətlərini bundan sonra da artıracaq,
regionda pedaqoji kadrların müasir
innovasiyalarla hərtərəfli əhatə olunması üçün
bütün qüvvələrini səfərbərliyə alacaqdır.
Lalə QURBANOVA,
AMİ Zaqatala filialının
Əlavə təhsil üzrə direktor müavini |