Sentyabrın 30-da Tələbə Qəbulu üzrə Dövlət Komissiyasında (TQDK) mətbuat konfransı keçirilmişdir.

Konfransda Tələbə Qəbulu üzrə Dövlət Komissiyasının sədri Məleykə Abbaszadə TQDK-nın 2011-2012-ci tədris ili üçün ali və orta ixtisas təhsili müəssisələrinə qəbul imtahanlarına dair müvafiq qərarlar qəbul etdiyini bildirmişdir. Qeyd etmişdir ki, III ixtisas qrupuna daxil olan beynəlxalq münasibətlər və regionşünaslıq ixtisasları 2011-ci ildən II ixtisas qrupuna keçiriləcəkdir. Beləliklə, adıçəkilən ixtisaslara qəbul olunmaq istəyən abituriyentlər II ixtisas qrupu üzrə imtahan verməlidirlər.

2011-2012-ci tədris ili üçün magistraturaya qəbul imtahanına ərizə qəbulunun və qəbul imtahanının I mərhələsinin 2011-ci ilin fevralında keçirilməsi nəzərdə tutulmuşdur.

Abituriyentlərə ali məktəblərə qəbul imtahanlarına səmərəli hazırlaşmaqda kömək məqsədi ilə 2011-ci ilin yanvarında Bakı şəhərində, eləcə də respublikanın müxtəlif bölgələrində birinci sınaq imtahanı keçiriləcəkdir. Növbəti sınaq imtahanlarının isə gələn ilin aprelindən müntəzəm olaraq keçirilməsi nəzərdə tutulmuşdur.

TQDK-nın sədri diqqətə çatdırmışdır ki, 2011-ci ildə keçiriləcək müvafiq qəbul imtahanlarında riyaziyyat fənni üzrə test tapşırıqlarının bəziləri açıqtipli olacaqdır.

Nazirlər Kabinetinin "Rezidentura təhsilinin məzmunu və təşkili Qaydaları"nın təsdiq edilməsi haqqında" 2010-cu il 18 mart tarixli qərarına uyğun olaraq rezidenturaya qəbul TQDK tərəfindən aparılacaqdır.

M.Abbaszadə jurnalistləri maraqlandıran sualları cavablandırmışdır.

AzərTAc