Təhsil Nazirliyinin "Qaynar xətt" xidmətinə (telefonlar: 496-34-82; 496-37-61; e-mail ünvanı: [email protected]) 2010-cu ilin sentyabr ayında 2083 müraciət daxil olub.

1887 müraciət telefonla, 196 müraciət isə elektron poçt vasitəsilə qəbul edilmişdir. Daxil olan müraciətlərin hamısı dinlənilib, qeydə alınmış, araşdırılmış və cavablandırılmışdır.

Sentyabr ayında daxil olan müraciətlər yeni dərs ilinin başlanması ilə əlaqədar sorğu xarakterli olmuşdur. Bu sorğular məktəbəqədər, ümumtəhsil, texniki peşə, orta ixtisas və ali məktəblərə qəbul, məktəbli forması, dərs bölgüsü, ümumtəhsil məktəbləri şagirdlərinin pulsuz dərsliklə təminatı və s. məsələlərlə əlaqədar olmuşdur.

Məktəbəqədər tərbiyə müəssisələrinə uşaqların qəbulu, ödəniş haqqı, iş rejimi barədə sorğular xidmət əməkdaşları və müvafiq struktur bölmələri tərəfindən cavablandırılmışdır.

Ümumtəhsil məktəblərinə şagird qəbulu, I siniflərə vaxtından əvvəl şagird qəbulu, məktəbli forması, IX siniflərdə mərkəzləşdirilmiş qaydada keçirilən payız imtahanları barədə sorğular cavablandırılmışdır. Eyni zamanda ümumtəhsil məktəblərinə müəllimlərin müsabiqə yolu ilə işə qəbulu və müəllimlərin dərs bölgüsünə dair çoxsaylı suallar cavablandırılmışdır.

Texniki peşə təhsili müəssisələri ilə əlaqədar əsasən, bu müəssisələrə şagird qəbuluna dair sorğular dinlənilib qeydə alınmışdır.

Orta ixtisas təhsili müəssisələrində tələbələrin köçürülməsi, bərpa olunması, təhsil haqqının  ödənilməsi kimi sorğulara aydınlıq gətirilmişdir.

Ali təhsil müəssisələri ilə əlaqədar tələbələrin köçürülmə və bərpası, təhsil haqqının ödənilməsi, bakalavr və magistr pillələrində ixtisaslaşma, təhsil sənədlərinin tanınması və s. sorğular xidmət əməkdaşları və nazirliyin müvafiq struktur bölmələri tərəfindən cavablandırılmışdır.

Yeni dərs ili ərəfəsində 2 özəl ali təhsil müəssisəsi tələbələrinin köçürülməsi ilə əlaqədar daha çox müraciət qəbul olunmuşdur (600-dən çox). Belə ki, Moskva Dövlət Açıq Universitetinin  Bakı filialının ləğvi və Azərbaycan Beynəlxalq Universitetinin fəaliyyətinə verilmiş xüsusi razılığın (lisenziya) qüvvədə olma müddətinin uzadılmaması barədə Təhsil Nazirliyinin 02.09.2010-cu il tarixli 1200 nömrəli əmrinin icrası ilə əlaqədar daxil olan bütün sorğular müvafiq sənədlərə uyğun cavablandırılmışdır.

Digər sorğular gənc müəllimlərin təyinatla işə qəbulu, beynəlxalq olimpiada qaliblərinə verilən güzəştlər, xaricdə təhsil, xarici ölkə təhsil müəssisələrindən verilmiş təhsil sənədlərinin tanınması, xaricdə təhsil alan tələbələrin ölkə təhsil müəssisələrinə köçürülməsi, dövlət proqramı üzrə xaricdə təhsil alan tələbələrin təhsil haqlarının  ödənilməsi qaydaları ilə əlaqədar olmuşdur.