Bu günlərdə Sumqayıt şəhərinin ümumtəhsil
məktəblərində çalışan veteran müəllimlər Hərbi
Komissarlıqda çağırışçı gənclər və onların
valideynləri ilə görüşüblər.
Tədbirdə Sumqayıt Şəhər Təhsil İşçiləri
Veteranlar Şurasının sədri Məşdi Zeynalov, şəhər
müharibə, əmək, silahlı qüvvələr və
hüquq-mühafizə orqanları veteranlar şurasının
sədri, 15 nömrəli məktəbin alman dili müəllimi,
əməkdar müəllim Leyla Qasımzadə çağırışçı
gənclər qarşısında Vətənə məhəbbət, torpağa
bağlılıq, düşmənə nifrət ruhlu çıxış ediblər.
Görüşdə Təbiət Elmləri Gimnaziyasının müəllimi,
şair-publisist Mir Sabir Nağıyev "Oxu, Qarabağın
şikəstəsini", 12 nömrəli orta məktəbin müəllimi
Məlahət Şəfiyeva "Azərbaycan ordusu" adlı
şeirlərini söyləyiblər, 29 nömrəli məktəbin
tarix müəllimi Qiyas Mustafayev isə Azərbaycanın
qəhrəman oğullarının keçdiyi rəşadətli döyüş
yollarından ətraflı söhbət açıb.
Tədbirdə iştirak edən veteranlardan 17 nömrəli
orta məktəbin müəllimi Həsən Həsənov, 8 nömrəli
məktəbin müəllimi Əbdül Fərəcov və başqaları
çıxışlarında hərbi xidmətə yola düşən gənclərə
Vətənin keşiyində ayıq-sayıq dayanmağı tövsiyə
ediblər.
Veteranların çağırışçı gənclərlə olan bu
görüşünü Sumqayıt Şəhər Hərbi Komissarlığının
əməkdaşları və valideynlər böyük razılıq hissi
ilə qarşılayıblar.
Ədalət DAŞDƏMİRLİ |