Hələ ötən zamanlardan bəri ömrümüzün bir parçası olan uşaqlıq dünyasını duyub, dərk etmək, həmin dünyanın arzu və istəyini poetik dillə qələmə almaq hər yazara qismət olmayıb.  

Fidan balalarımızın ağ kətan kimi təmiz dünyasını, baldan şirin dilini, onların sadə göründüyü qədər qeyri-adi, ecazkar və mürəkkəb fəlsəfi düşüncələrini poetik sözlə ifadə etmək müəllifindən başqalarına nəsib olmayan xüsusi istedad tələb edir.

Belə yazarlardan biri, öz dəst-xətti ilə poeziyamızda yaxşı tanınan, şair Ələmdar Quluzadənin bu günlərdə işıq üzü görmüş "Ətirşah ətri" (Bakı, "Ozan" nəşriyyatı, 2010. 80 səh., sayı 2000 nüsxə) şeirlər kitabı balaca oxucuların ixtiyarına verilmişdir.

"Öyrədirlər, öyrənirik", "Kim hazırcavab, kim dəymədüşərdir" və "Qulağımla eşidib, gözlərimlə görmüşəm" bölmələrindən ibarət olan kitabda uşaq dünyasından bəhs edən müxtəlif məzmunlu şeirlər toplanmışdır. Nəfis şəkildə çap edilmiş bu topluda yazılanlara uyğun verilmiş rəngli şəkillər şeirlərdəki fikri tamamlamaqla əyani vəsait kimi oxucunun daha aydın dərk etməsinə yardımçı olur.

Kitabı vərəqlədikcə, şeirləri oxuduqca hiss edirsən ki, Ələmdar Quluzadə uşaq dünyasına yaxşı bələddir və fidan balalarımızın arzu və istəklərini, onların qeyri-adi duyğularını, təmiz daxili aləmlərini ürək çırpıntılarıyla elə "öz dillərində" qələmə almağa müyəssər olub. Belə şeirlərdən bir-iki misal gətirmək yerinə düşər:

Fərrux yolçu deyil ki,

Yolla gedən yolçudur.

Yolla gedən nə bilsin,

Fərrux fırıldaqçıdır.

Bundan başqa, şair "Dünyaya uşaq gəlir" şeirində:

Uşaq gəlmir bu qoca

Dünyaya daş atmağa,

Uşaq gəlir bu qoca

Dünyanı yaşatmağa

- deməsi ilə bir tərəfdən bu dünyanın ən ali, bəşəri varlığı olan uşaqların həyatımızın ayrılmaz bir hissəsi olduğunu səmimi bir şəkildə, şirin, poetik dillə oxuculara çatdırırsa, digər tərəfdən onları sevərək qorumağımızı tövsiyə edir.

Ümumiyyətlə, şair Ələmdar Quluzadənin  özünəməxsus duyum tərzi, poetik dünyası vardır. Əminəm ki, şairin balaca fidanlara həsr etdiyi bu kitabı geniş oxucu auditoriyası tərəfindən maraq və məhəbbətlə qarşılanacaqdır. 

Nizami MİRZƏ