BDU-nun rektoru, akademik Abel Məhərrəmov "British Council"in rəhbəri Paul Klementonu qəbul edib. BDU haqqında qonağa ətraflı məlumat verən rektor onu universitetdə görməkdən məmnun olduğunu bildirib. Akademik Abel Məhərrəmov ölkə Prezidenti İlham Əliyevin Azərbaycan elmi və təhsilinin Avropa təhsil sisteminə uyğunlaşdırılması istiqamətində gördüyü çoxşaxəli işlərdən danışıb, ölkədaxili təhsil və elm proqramlarının həyata keçirilməsini, azərbaycanlı gənclərin xaricdə təhsilinin təmin edilməsini də həmin prinsiplərin tərkib hissəsi sayıb.

İnteqrasiya mexanizmlərindən, bu prosesi gücləndirmək üçün tələbələrin ingilis dilini yaxşı bilmələrinin vacibliyindən danışan rektor bildirib ki, universitetdə Azərbaycan və rus dilləri ilə yanaşı, bəzi fakültələrdə ingilis dilində də qruplar fəaliyyət göstərirlər. Rektor bütün fakültələrdə ingilisdilli qrupların yaradılmasının nəzərdə tutulduğunu, növbəti tədris ilinin sonunda bu dildən də dövlət imtahanlarının veriləcəyini bildirib.

Qəbul üçün rektora təşəkkür edən Raul Klementon rəhbərlik etdiyi şirkətin ali təhsilin müəyyənləşdirilməsi istiqamətində proqramından, bu proqrama uyğun olaraq əməkdaşlığın genişləndirilməsində maraqlı olduqlarından bəhs edib. Qonaq ingilis dilinin tədrisi ilə bağlı mərkəzin yaradılmasını, Azərbaycan ali təhsil müəssisələri ilə Böyük Britaniya universitetlərinin əlaqələrinin qurulmasını arzu etdiyini bildirib.

Sonda qərara alınıb ki, əməkdaşlıq universitetə ingilis dilinin tədrisi prosesinə metodoloji baxımdan kömək edilməsi və Böyük Britaniya universitetləri ilə əməkdaşlıq konturlarının əldə olunması istiqamətində aparılsın.  

BDU-nun Mətbuat və informasiya şöbəsi