Ötən əsrdə, 1940-cı ilin 14 mayında Bakıda,
qədim Qız qalasına yaxın bir məkanda mütəfəkkir
şair Nizami Gəncəvinin anadan olmasının 800
illik yubileyi münasibətilə ədəbiyyat təmayüllü
muzey açıldı.
İllər ötdükcə muzeyin ekspozisiya zallarının
sahəsi genişləndirildi. Bir neçə minillik tarixi
olan ədəbiyyatımızla bağlı eksponatların sayı
artdı. Söz sənətkarlarımızın həyatı, məişəti və
yaradıcılığı ilə bağlı məlumatlar, əşyalar, rəsm
əsərləri, sənət nümunələrinin ekran, teatr
həyatı ilə bağlı fotokadrlar yeni ekspozisiyalar
üçün dəyərli materiallara çevrildi.
Müxtəlif zamanlarda ayrı-ayrı yazıçı, şair və
dramaturqun yubileyləri ilə bağlı sərgilər
təşkil olunmuş muzeydə son illər dünya
səviyyəsində təmir və yenidənqurma işləri
aparılmışdır; rəsm əsərləri və heykəltəraşlıq
nümunələri tamamilə yenidən, zövqlə bərpa
edilmiş, çoxlu yeni avadanlıqlar alınmışdır.
Muzeyin ekspozisiya zallarının sayı 19-dan 40-a
qədər artırılmışdır.
İndi burada 30 minə yaxın eksponat vardır.
İncəsənətin müxtəlif sahələri ilə bağlı
materiallar zəngin Azərbaycan folkloru və yazılı
ədəbiyyatı haqqında muzeyə gələnlərdə dərin
təəssürat yaradır, geniş informasiya çatdırır.
Ən qədim zamanlardan müasir dövrə qədər
Azərbaycan ədəbiyyatını əks etdirən mədəniyyət
və elm ocağının - Nizami Gəncəvi adına Milli
Azərbaycan Ədəbiyyatı Muzeyinin 2010-cu ildə 70
illik yubileyi keçirildi.
Ölkə Prezidenti İlham Əliyevin sərəncamları ilə
muzeyin əməkdaşlarına yüksək fəxri adlar
verildi, bir qrup işçi "Tərəqqi" medalı ilə
təltif olundu.
Yubiley tədbirləri çərçivəsində keçirilən elmi
konfransda dinlənilmiş 100-dən çox məruzəni
əhatə edən kitab nəşr olundu.
Yaddaqalan tədbirlərdən biri muzeyə xarici
ölkələrdən eksponatlar təqdim edilməsi oldu.
Belə ki, Almaniyada yaşayan tədqiqatçı
Məhəmmədəli Hüseyni mədəni-maarif ocağına Saib
Təbrizinin portretini hədiyyə etdi. Həmçinin
S.Təbrizinin 400 illiyi münasibətilə Tofiq
Quliyevin şairin sözlərinə bəstələdiyi romansın
klaviri də muzeyə təqdim olundu.
70 illik zəngin salnaməsi olan muzeydə bu ilin
yazında "Xalq oyunları mədəniyyəti: klassik irs
və müasirlik" mövzusunda 3 gün davam edəcək
konfrans keçirilməsi nəzərdə tutulub.
Ş.MƏMMƏDOV |