46
nömrəli Məktəbdənkənar Tərbiyə İşi Mərkəzində
1991-ci ildən başlayaraq DYP idarəsi ilə birgə
"Yol hərəkəti qaydaları" proqramı, "Uşaqlar və
Yol Təhlükəsizliyi Layihəsi"nə uyğun məşğələlər,
uşaqların yaradıcılığını əks etdirən sərgilər,
bədii, təsviri baxış və müsabiqələr, yarışlar və
stimullaşdırıcı tədbirlər keçirilir.
Yanvarın
18-də isə Bakıda, Hökumət evinin qarşısında
"Uşaqlar və Yol Təhlükəsizliyi Layihəsi"nə uyğun
Bakı şəhər DYP idarəsi 46 nömrəli Məktəbdənkənar
Tərbiyə İşi Mərkəzi ilə birgə "Keç yeraltı
keçiddən, uzaq ol təhlükədən!" devizi altında
maarifləndirici aksiya keçirilib. Aksiyanın
keçirilməsində əsas məqsəd uşaqlara yol hərəkəti
qaydalarının öyrədilməsi və sonrakı yaş
dövrlərində təfəkkürlərində təhlükədən uzaq
olmaq tərbiyəsi aşılamaq, onlarda təhlükəsiz
həyat üçün davranış vərdişlərinin
formalaşdırılmasına nail olmaqdan ibarətdir.
Aksiyada
Bakı Şəhəri üzrə Təhsil İdarəsinin aparıcı
mütəxəssisi Rövşən Əliyev, Bakı Şəhər DYP
idarəsinin şöbə rəisi, polis
polkovnik-leytenantı Vaqif Əsədov, avto-ekspert,
texniki elmlər namizədi Sülhəddin Gözəlov, 46
nömrəli Məktəbdənkənar Tərbiyə İşi Mərkəzinin
şöbə müdiri Fəridə Süleymanova, Bakının Nəsimi,
Nərimanov, Yasamal, Səbail, Nizami, Xətai,
Binəqədi, Suraxanı rayonlarında yerləşən
məktəblərdən və Slavyan Universitetinin
məktəb-lisey kompleksindən müəllimlər və 100-dən
çox şagird iştirak edirdi.
Tədbirdə
çıxış edənlər qloballaşmaya uyğun olaraq
Azərbaycanda və Bakı şəhərində avtomobillərin
sayının artmasına görə yeraltı və yerüstü
keçidlərin inşa edilməsi və yeni yolların
çəkilməsinin vətəndaşların təhlükəsizliyinə
xidmət etdiyini bildirdilər. Aktuallığına görə
vətəndaşların maarifləndirilməsi üçün belə
tədbirlərin mütəmadi keçirilməsinin vacibliyini
qeyd etdilər. Sonda xüsusi forma geyinmiş balaca
"yol polisi işçiləri" yol hərəkəti qaydalarına
riayət etməyən bir neçə vətəndaşı saxlayıb
onlarla maarifləndirici söhbət apardılar və
yaxınlıqdakı yeraltı keçidi onlara göstərib
təhlükəsizliklərini təmin etmək üçün həmin
keçiddən keçmələrinin vacibliyini diqqətə
çatdırdılar.
Nizami MİRZƏ |
|