Fevralın
15-də Bakıdakı 9 nömrəli orta məktəbdə Xocalı
faciəsinin 19-cu ildönümü ilə əlaqədar soyqırımı
qurbanlarının xatirəsinə həsr olunmuş anım
mərasimi keçirildi. Mərasim başlamazdan əvvəl
faciədə həlak olanların xatirəsi bir dəqiqəlik
sükutla yad edildi. Azərbaycan Respublikasının
Dövlət bayrağı səhnəyə gətirildi.
Dövlət
himninin səslənməsi ilə başlanan tədbiri açıq
elan edən məktəbin direktoru Zinyət Əhmədova
Xocalı faciəsi haqqında məlumat verdi. Qeyd
olundu ki, Xocalı faciəsi bəşər tarixində
misli görünməmiş soyqırımıdır. Z.Əhmədova
bildirdi ki, erməni separatçılarının terrorçu
dəstələri "Böyük Ermənistan" yaratmaq xülyası
ilə xalqımıza qarşı daim təxribatlar, soyqırımı
törədiblər. Azərbaycan xalqı əsrlər boyu başına
gətirilən qırğınları, faciəli hadisələri
unutmamalı, daim yad etməli, öz tarixini
yazmalı, nəsillərdən-nəsillərə çatdırmalı, hər
bir hadisədən nəticə çıxarmalıdır.
Tədbirin
aparıcıları Murad,Günel, Rəsmiyyə 19 il öncə
fevralın 25-dən 26-na keçən gecə ermənilərin
dinc Xocalı sakinlərinə qarşı törətdikləri
vəhşiliklərdən, faciənin başvermə
səbəblərindən, o vaxtkı Azərbaycan
hakimiyyətinin öz vətəndaşlarının taleyinə qarşı
göstərdiyi biganəlikdən danışdılar, qırğının
miqyasını, nəticələrini əks etdirən dəhşətli
statistikanı diqqətə çatdırdılar.
Məktəbin
şagirdləri Xocalı hadisələrinə, həmin kütləvi
qırğın zamanı düşmən əli ilə faciəli şəkildə
həlak olmuş yüzlərlə insanın acı taleyinə həsr
olunmuş şeirlər söylədilər, səhnəciklər
göstərdilər.
Tədbirdə çıxış
edənlər Xocalı faciəsinin dəhşətlərindən söz
açaraq torpaqlarımızın düşməndən tezliklə azad
olunacağına və bu qisasın yerdə qalmayacağına
əminlik ifadə etdilər.
Tədbirin
sonunda Xocalı faciəsini əks etdirən film
nümayiş olundu.
Rəşad ZİYADOV |