|
Bakı Dövlət Universitetində (BDU) Ekologiya və
torpaqşünaslıq fakültəsinin, "Ekoloji kimya və
ətraf mühitin mühafizəsi", həmçinin ekoloji
monitorinq üzrə laboratoriyaların açılışı
olmuşdur.
AzərTAc xəbər verir ki, tanınmış alimlərin,
təhsil işçilərinin iştirak etdikləri tədbirdə
BDU-nun rektoru, akademik Abel Məhərrəmov
Azərbaycan Prezidenti İlham Əliyevin elmin,
təhsilin inkişafına böyük önəm verdiyini
bildirmişdir.
2010-cu ilin "Ekologiya ili" elan edildiyini
xatırladan rektor dövlətimizin başçısının bu
sahəyə daim diqqət göstərdiyini vurğulamışdır.
Rəhbərlik etdiyi ali məktəbdə təhsilin inkişafı
üçün səmərəli tədbirlərin həyata keçirildiyini
qeyd edən rektor yeni açılan fakültənin və
laboratoriyaların əhəmiyyətindən danışmışdır.
Vurğulanmışdır ki, Ekologiya və torpaqşünaslıq
fakültəsi müvafiq kafedraların bazasında
yaradılmışdır.
A.Məhərrəmov gələcəkdə digər ixtisasların da
açılmasının nəzərdə tutulduğunu bildirmişdir.
Ekologiya və təbii sərvətlər naziri Hüseynqulu
Bağırov, Dövlət Torpaq və Xəritəçəkmə
Komitəsinin sədri, akademik Qərib Məmmədov
Azərbaycanın dinamik inkişaf etdiyini
vurğulamışlar.
Ekologiya və ətraf mühitin qorunması
məsələlərinin aktuallığından bəhs edən natiqlər
BDU-da yeni açılan fakültə və laboratoriyaların
təhsilin inkişafında, elmi-tədqiqatların
aparılmasında səmərəli rol oynayacaqlarını qeyd
etmiş, müəllim və tələbələrə uğurlar
arzulamışlar.
Sonra tədbir iştirakçıları müasir avadanlıqla
təchiz edilmiş fakültə və laboratoriyalarla
tanış olmuşlar.
Tədbirdə Hüseynqulu Bağırova, akademik Qərib
Məmmədova BDU-nun "Universitetin dostu" mükafatı
təqdim edilmişdir. |
