BDU-nun
rektoru, akademik Abel Məhərrəmov British
Council-in rəhbəri Paul Klementonla görüşüb.
Görüşün əsas məqsədi BDU ilə British Council
arasında Anlaşma Memorandumunun imzalanması
olub. Ötən ilin dekabr ayında tərəflər arasında
keçirilən görüşdən sonra əməkdaşlıq
konturlarının əldə olunması istiqamətində səylər
müsbət qiymətləndirilib. Rektor Abel Məhərrəmov
və Paul Klementon böyük və faydalı işin
başlandığını, bunun uğurlu nəticələr verəcəyinə
əminlik ifadə ediblər.
Sonra
imzalanma mərasimi olub. Memorandumun məqsədi
British Council-in Ali Təhsilin
Beynəlmiləlləşdirilməsi layihəsi sahəsində
fəaliyyətlərin koordinasiyası və davamlı
əməkdaşlıq üçün çərçivə müəyyən etməkdən
ibarətdir. Ali Təhsilin Beynəlmiləlləşdirilməsi
British Council-in ali təhsil sahəsində həyata
keçirdiyi bir proqramdır. Əsas məqsəd ali təhsil
sahəsində qlobal əməkdaşlıq, yəni ali təhsilin
müxtəlif aspektlərinin, keyfiyyət təminatı,
ölkələrarası təhsil, sahibkarlıq və müəssisələr,
ötürülə bilən bacarıqlar və səriştənin
inkişafıdır. Memorandumda təhsil sistemində
mühüm aspektlərin inkişaf etdirilməsi üçün
British Council-in dəstəyi ilə BDU ilə Birləşmiş
Krallığın müvafiq ali təhsil müəssisələri
arasında uzunmüddətli əməkdaşlıq əlaqələrinin
qurulması nəzərdə tutulur ki, buraya elmi
işçilər, fakültə heyəti və müəllim heyətinin
mübadiləsi də daxil ola bilər.
Memorandumda,
eyni zamanda ingilis dili müəllimlərinin ingilis
dili biliklərinin təkmilləşdirilməsi və
qeyri-ingilis dilini tədris edən müəllimlərin
ingilis dili səviyyəsinin artırılması da nəzərdə
tutulur.
Şakir CƏFƏROV |