Yeni fənn
kurikulumlarının tətbiqi vəziyyəti ilə tanış
olmaq, dərslərdə fəal təlim üsullarından, yeni
texnologiyalardan müəllimlərin nə dərəcədə
səmərəli istifadə etmələrini müəyyənləşdirmək,
qabaqcıl iş təcrübəsini öyrənib yaymaq məqsədi
ilə digər təhsil ocaqlarında olduğu kimi,
Bakıdakı 176 nömrəli orta məktəbdə də tez-tez
"açıq dərs"lər təşkil olunur. Növbəti belə "açıq
dərs"i məktəbin ibtidai sinif müəllimi Sürəyya
Qüdrətova II "a" sinfində aparmışdır. "Açıq
dərs"də bu təhsil ocağından və digər
məktəblərdən ibtidai sinif müəllimləri iştirak
etmişlər.
Dərsdən əvvəl
176 nömrəli orta məktəbin direktoru Sairə
Rəsulova tədris ocağında təhsilin keyfiyyətini
yüksəltmək üçün görülən işlər, yeni
kurikulumların tətbiqi vəziyyəti barədə məlumat
vermiş, bu sahədə toplanmış müsbət təcrübəni
bölüşmək, müəllimlərin tədris prosesində hansı
çətinliklərlə üzləşdiklərini müəyyənləşdirmək
üçün mütəmadi olaraq "açıq dərs"lər
keçirildiyini bildirmişdir.
Sonra
S.Qüdrətovanın "Bağban və oğulları" mövzusunda
"açıq dərs"i dinlənilmişdir. Dərs onu dinləyən
ibtidai sinif müəllimlərində böyük maraq
doğurmuşdur. Buna səbəb müəllimin dərsini müasir
dərsə verilən tələblər səviyyəsində qurması,
dərsdə maraqlı motivasiya yaratması, interaktiv
təlim üsullarından, resurslardan geniş və
yerli-yerində istifadə etməsi, şagirdləri
müstəqil işlətmək üçün məqsədyönlü tapşırıqlar
hazırlaması olmuşdur.
Məqsədi
şagirdlərin hekayəni düzgün, şüurlu, ifadəli
oxuması, onun məzmununu həyat haqqında
düşüncələri ilə əlaqələndirərək fikir yürütməsi
olan dərsdə müəllim əsasən qruplarla iş və
"beyin həmləsi" üsulları ilə işləmişdir. Öncə
lövhədən birində "İnsana xas olan müsbət
xüsusiyyətlər", digərində "İnsana xas olan mənfi
xüsusiyyətlər" sözləri yazılmış 2 plakat
asılmış, onlar üzərində iş aparılmışdır.
Şagirdlər insanlara xas müsbət və mənfi
xüsusiyyətləri qeyd etdikdən sonra müəllim
onlardan insanda hansı xüsusiyyətlərin üstünlük
təşkil etməsinin arzuolunan olduğunu soruşmuş və
müvafiq cavab aldıqdan sonra mətn üzərində iş
aparmışdır.
Yeni mövzunun
möhkəmləndirilməsi mərhələsində müəllim
sinifdəki 4 qrupun hərəsinə atalar sözünün
mənasını izah etmək və suallara cavab vermək
təklif olunan iş vərəqləri paylamış, şagirdlər
onları müstəqil yerinə yetirmişlər. Sonra qrup
liderləri həll olunmuş tapşırıqların təqdimatını
etmiş, digər qrupların həmin təqdimatlara
əlavələri dinlənilmişdir.
Qrupların,
qrup daxilində şagirdlərin cavabları xüsusi
cədvəl üzrə qiymətləndirilmiş, şagirdlərə evdə
"Bağban və oğulları" hekayəsinə uyğun hekayə
yazmaq tapşırılmışdır.
Dərs başa
çatdıqdan sonra onun müzakirəsi aparılmış, dərsi
dinləyənlər müəllimin 45 dəqiqəlik fəaliyyətini
müsbət qiymətləndirmiş, dərsin üstün
cəhətlərindən söz açmış, bəzi təklif və
tövsiyələrini səsləndirmişlər. Məktəbdə
əlverişli təlim mühitinin yaradılmasında, "açıq
dərs"lərin ənənə halını almasında direktor Sairə
Rəsulovanın, onun müavinləri Arzu Qulamova və
Sevda Bayramovanın xidmətləri xüsusi qeyd
olunmuşdur.
Yusif ƏLİYEV |