|
 Bu
günlərdə Naxçıvan Dövlət Universitetində
görkəmli dramaturq Mirzə Fətəli Axundovun "Müsyö
Jordan və Dərviş Məstəli şah" klassik komediyası
ali məktəbin fransız dili ixtisası üzrə təhsil
alan tələbələrinin quruluşunda fransız dilində
səhnəyə qoyulub.
Tamaşada Şahbaz bəy rolunun ifaçısı xüsusi
istedadı ilə seçilən IV kurs tələbəsi Emin
Rzayev, Şəhrəbanu xanım rolunun ifaçısı I kurs
magistri Svetmira Quliyeva, Hatəmxan Ağa rolunun
ifaçısı IV kurs tələbəsi Nəsir Seyidov, Gülçöhrə
rolunun ifaçısı I kurs tələbəsi Təhminə Rzayeva,
Müsyö Jordan rolunun ifaçısı III kurs tələbəsi
Xaliq Tağıyev, Dərviş Məstəli şah rolunun
ifaçısı isə III kurs tələbəsi İsrafil Rəhimli
olub.
Tamaşa ilə bağlı təəssüratlarını bölüşən rektor,
akademik İsa Həbibbəyli təşkilatçılıq işini,
tələbələrin aktyorluq səriştələrini, səhnə
mədəniyyətlərini yüksək dəyərləndirib, belə
mədəni tədbirlərin mədəniyyətlərarası
münasibətlərin inkişafı və möhkəmlənməsindəki
rolunu vurğulayıb, həvəskar aktyorları bu uğur
münasibətilə təbrik edib.
Qeyd edək ki, bu günədək universitetin
səhnəsində "Koroğlu" və "Dədə Qorqud" dastanları,
"Leyli və Məcnun" operası, İsmayıl bəy
Qutqaşınlının "Rəşid bəy və Səadət xanım", Cəlil
Məmmədquluzadənin "Poçt qutusu" kimi əsərləri
tələbələr tərəfindən hazırlanaraq tamaşaçıların
ixtiyarına verilib.
Nərmin CƏFƏROVA |
