Aprelin 14-də paytaxtda Bakı Təhsil Məlumat
Mərkəzi, Beynəlxalq Universitetlər Şurası (CİS)
və Amerika Birləşmiş Ştatları beynəlxalq özəl
orta məktəbləri tərəfindən təşkil olunmuş 2
təhsil yarmarkası keçirildi. Bakıdakı 23 nömrəli
orta məktəbdə və "Park İnn" otelində keçirilən
yarmarkaların əsas məqsədi maraqlananları
dünyanın bir neçə universitetində və beynəlxalq
özəl məktəbində təhsilalma imkanları haqqında
lazımi məlumatla təmin etməkdir.
Yarmarkada şagirdlər, tələbələr, eləcə də
valideynlər ABŞ, İngiltərə, İtaliya, İspaniya və
başqa ölkələrdə yerləşən universitetlərin və
ABŞ-ın özəl orta məktəblərinin nümayəndələri ilə
görüşərək maraqlandıqları təhsil müəssisələri
haqqında ətraflı məlumat əldə etdilər.
Təqdim olunan ali və orta təhsil müəssisələrinin
tədris proqramları ilə yaxından tanış olan
yarmarka iştirakçıları, eyni zamanda bu
müəssisələrin fəaliyyətini əks etdirən zəngin
materiallar və bukletlərlə təmin olundular.
Sərgidə ABŞ-ın ölkəmizdəki səfirliyinin
nümayəndələri də iştirak ediblər.
H.ƏKBƏROVA |