Azərbaycan Dövlət Mədəniyyət və İncəsənət
Universitetində Azərbaycanın görkəmli sənətkarı,
xalq artisti Şəmsi Bədəlbəylinin anadan
olmasının 100 illiyi qeyd edildi. Ölkəmizin
mədəniyyət, sənət həyatına, xüsusən də teatr
dünyasına əvəzsiz xidmətlər göstərmiş Şəmsi
Bədəlbəylinin məhz bu təhsil ocağında anılması
təsadüfi deyildir.
Çünki
o, bu sənət məbədində təhsil almış, pedaqoji
fəaliyyət göstərmiş kadrlarla işləmiş, onlarla
birgə saysız-hesabsız səhnə əsərlərini meydana
çıxarmışdır.
Görkəmli sənətkara həsr olunmuş tədbiri giriş
sözü ilə açan ADMİU-nun rektoru, professor
Timuçin Əfəndiyev Ş.Bədəlbəylinin şərəfli sənət
ömrü, məşhur nəsil şəcərəsi, mədəniyyət
tariximizdəki uca mövqeyi barədə ətraflı məlumat
verdi. Sənətkarın yaradıcılıq yönü, üslubu,
milli səhnəqrafiyaya gətirdiyi yeniliklər barədə
universitetin müəllimi, professor Məryəm
Əlizadənin geniş məruzəsi böyük maraqla
dinlənildi. ADMİU-nun prorektoru, sənətşünaslıq
doktoru Rafiq Sadıqov Şəmsi Bədəlbəylinin
yaradıcılıq bioqrayifasında əhəmiyyətli yer
tutan məqamları sadaladı. Respublika Teatr
Xadimləri İttifaqının sədri, professor Azər Paşa
Nemətov Şəmsi müəllimin uzun illər onun başçılıq
etdiyi Gənc Tamaşaçılar Teatrının kollektivinə
atalıq qayğısından, təmənnasız yardımından,
ümumiyyətlə, insani keyfiyyətlərindən son dərəcə
maraqlı detallarla söhbət açdı.
Vaxtilə Şəmsi Bədəlbəyli ilə sıx yaradıcılıq
ünsiyyətində olmuş, bu gün isə öz təcrübələrini
gənclərlə bölüşən sənətçi-alimlərdən
professorlar Ağakişi Kazımov, İlham Namiq Kamal,
Ramiz Əzizbəyli, xalq artisti Amalya Pənahova
yubilyar haqqında şirin xatirələrini auditoriya
ilə bölüşdülər.
Tədbirin sonunda Şəmsi Bədəlbəylinin oğlu,
dünyaca məşhur musiqiçi Fərhad Bədəlbəyliyə söz
verildi. Fərhad müəllim belə hərarətli, səmimi
bir mərasimi təşkil etdiyinə görə hörmətli
rektor T.Əfəndiyev başda olmaqla ADMİU-nun
çoxsaylı kollektivinə ailəsi adından
minnətdarlığını bildirdi. Çıxışında Fərhad
Bədəlbəyli atası ilə bağlı ən unudulmaz, həyati
məqamları özünəməxsus şux, əlvan boyalarla ilk
dəfə konfrans iştirakçılarına sürpriz olaraq
yetirdi.
Tədbirin sonunda Şəmsi Bədəlbəylinin həyatını
əks etdirən fotostend və 10 dəqiqəlik videofilm
nümayiş etdirildi.
İntiqam MEHDİZADƏ,
ADMİU-nun mətbuat katibi |
|