Müasir şəraitdə rəhbər və digər kateqoriyalardan
olan pedaqoji kadrların ixtisasının
artırılmasının təhsilin keyfiyyətinin
yüksəldilməsində böyük rolu var.
Bakı
Pedaqoji Kadrların İxtisasartırma və
Yenidənhazırlanma İnstitutunda son 3 ildə bu
istiqamətdə həyata keçirilən keyfiyyət
dəyişikliklərinin nəticəsidir ki, ixtisasartırma
kurslarına müəllimlər həvəslə gəlir, davamiyyət
problemi tamamilə həll olunub.
Aprelin 7-dən 20-dək Bakı Şəhəri üzrə Təhsil
İdarəsinin müvafiq əmrinə əsasən məktəb
direktorları üçün ixtisasartırma kursu təşkil
edilmişdi. Şəhərin müxtəlif rayonlarından olan
24 məktəb direktoru ardıcıl olaraq maraqlı
mühazirələr dinlədi, treninq və seminarların
iştirakçısı oldu.
İlk mühazirəni Azərbaycanda müəllim kadrları
hazırlayan ali məktəblərlə gələcəkdə Avropa
Komissiyasının birgə əməkdaşlığını reallaşdırmaq
məqsədilə ölkəmizdə tanışlıq səfərində olan
Avropa Komissiyasının təhsil üzrə eksperti
professor Lyudmila Prokofyevna Puxovskoya oxudu.
Lyudmila Prokofyevna fasiləsiz təhsildə Avropa
kompetensiyaları haqqında çox maraqlı məlumatlar
verdi və fikir mübadiləsinə şərait yaratdı.
Qeyd etmək istərdim ki, mühazirəçilərin siyahısı
institutun rektoru, professor Asəf Zamanovla
razılaşdırılır və kurslara elm, təhsil
ocaqlarının tanınmış rəhbərləri və
mütəxəssisləri cəlb edilir.
Təhsil Nazirliyinin Monitorinq və qiymətləndirmə
şöbəsinin müdiri Təranə Hacıyeva, Təhsil
Muzeyinin direktor müavini Arif Muradov, Bakı
Şəhəri üzrə Təhsil İdarəsi müdirinin müavini
Hüseyn Əsgərov, Beynəlxalq əlaqələr və
ictimaiyyətlə əlaqə sektorunun müdiri Zəminə
Əliqızı, məsləhətçi Şəmsi Qocayev,
Metodmərkəzin direktor müavini Nadir Əliyev,
pedaqoji elmlər doktoru, professor Rüfət
Hüseynzadə, fizika-riyaziyyat elmləri doktoru,
professor Aydın Kazımzadə, Azərbaycan Milli
Tarix Muzeyinin baş elmi işçisi Nardanə Yusifova,
BPKİYİ-nin əməkdaşlarından filologiya elmləri
doktoru Aydın Paşayev, pedaqoji elmlər üzrə
fəlsəfə doktoru Şamil Sadıqov, tarix elmləri
üzrə fəlsəfə doktoru Aydın Aslanov, kimya
elmləri üzrə fəlsəfə doktoru Aydın Əhmədzadə və
başqaları təhsilin təşkili və idarə edilməsi ilə
bağlı maraqlı mühazirələr oxudular.
Kursa qeyri-hökumət təşkilatlarının
nümayəndələri də cəlb olundu. Belə ki, Azad
Müəllimlər Birliyinin sədri, Azərbaycan
Avrointeqrasiya Milli İctimai Komitəsinin
həmsədri Məlahət Mürşüdlü və Azərbaycan Milli
Valideyn-Müəllim Assosiasiyasının baş eksperti
Şahin Rəcəblinin söylədikləri maraqla qarşılandı.
Təcrübə mübadiləsi məqsədi ilə 5 nömrəli
məktəbin direktoru Nərminə Gündüzlü tərəfindən "Təhsilin
keyfiyyətinin artırılması yolları" mövzusunda
keçirilən treninqdə kurs dinləyiciləri böyük
həvəslə iştirak etdilər.
Təhsil sahəsində aparılan islahatlara uyğun
olaraq xalqımızn milli mənəvi dəyərlərinin
öyrənilməsi məqsədi ilə məktəb direktorları üçün
Azərbaycan Milli Tarix Muzeyinə də ekskursiya
təşkil edildi. Muzeyin direktoru, Azərbaycan
Milli Elmlər Akademiyasının vitse-prezidenti,
akademik Nailə Vəlixanlı kurs dinləyicilərini
qarşıladı və gələcəkdə məktəblərlə əlaqələrin
daha sıx olmasını arzuladı.
Kurs müddətində məktəb direktorları institutun
rektoru, professor Asəf Zamanovla görüşərək kurs
haqqında fikirlərini söylədilər, institutda
gedən müsbət dəyişikliklərdən söhbət açdılar.
Mehriban Ələkbərova, 179 nömrəli məktəbin
direktoru:
"Aprelin 7-də, kursun ilk günündə binaya daxil
olanda hansı auditoriyaya gedəcəyimi bilmirdim
və qarşılaşdığım ilk insan institutun rektoru
Asəf müəllim oldu. Professor məni elə hörmət və
nəzakətlə qarşıladı ki, məndə xoş əhvali-ruhiyyə
yarandı. Bir aya yaxın davam edən kurslarda elə
mənəvi-psixoloji iqlim yaradılmışdı ki, vaxtın
necə keçdiyini bilmədim.
Kursun rəhbəri Nisə xanım dərsini anket sorğusu
ilə başladı. Kurs boyu bizi maraqlandıran
suallara cavab aldıq. Mən anketdə çox aktual bir
sahə olan şagird nailiyyətlərinin
qiymətləndirilməsi ilə bağlı Təhsil Nazirliyinin
Monitorinq və qiymətləndirmə şöbəsinin müdiri
Təranə Hacıyevanı dinləmək istədiyimi
bildirmişdim və xahişim nəzərə alındı.
Direktorların suallarını Təranə xanım ətraflı
cavablandırdı. Hesab edirəm ki, kurs məhz bu
cür təşkil edildiyi üçün səmərəli və məhsuldar
oldu".
Rəhimə Əliyeva, 191 nömrəli məktəbin direktoru,
əməkdar müəllim:
"Hər bir fəaliyyət sahəsinin səmərə və
əhəmiyyətlilik əmsalı o sahəni idarə edənin
peşəkarlığından, mənəvi-əxlaqi keyfiyyətlərindən
çox asılıdır. Üç həftə ərzində iştirakçısı
olduğumuz ixtisasartırma kursunun təşkili, idarə
edilməsi və məzmunu buna sübutdur. Biz bu kursda
idarəetmə mədəniyyətinin şahidi olduq. Şagird
nailiyyətlərinin qiymətləndirilməsi, kurikulumla
bağlı aldığım məlumatlar mənim üçün çox vacib
idi. 5 nömrəli məktəbdə "Təhsilin keyfiyyətinin
artırılması yolları" mövzusunda keçirilən
treninq mənə xüsusi zövq verdi.
Prezidentimiz cənab İlham Əliyevin və Heydər
Əliyev Fondunun prezidenti, YUNESKO-nun və
İSESKO-nun xoşməramlı səfiri Mehriban xanım
Əliyevanın təhsilin inkişafına göstərdikləri
diqqət və qayğı nəticəsində son illərdə 2 mindən
artıq məktəb binası tikilmiş, bir çox
məktəblərdə əsaslı təmir işləri aparılmış,
maddi-texniki bazanın gücləndirilməsi
istiqamətində mühüm işlər görülmüşdür. Çox
istərdim ki, yaxın gələcəkdə ixtisasartırma
institutunda da bu istiqamətdə işlər öz əksini
tapsın. Başqa sözlə, institutun fəaliyyət
məzmununda dəyişikliklər olduğu kimi, formasında
da dəyişikliklər olsun".
Sonda professor Asəf Zamanov bu kursun
institutla məktəblər arasında əməkdaşlığın daha
sıx olmasına zəmin yaratdığını söylədi və
gələcək planlardan danışdı.
Nisə CƏLİLZADƏ,
kursun rəhbəri |