|
 Mayın
6-da Azərbaycan xalqının ümummilli lideri,
müstəqil Azərbaycan dövlətinin memarı və
qurucusu Heydər Əliyevin anadan olmasının 88-ci
ildönümü münasibətilə ADNA-nın inzibati
binasında ulu öndərin barelyefinin açılışı olub.
Azərbaycan Respublikasının təhsil naziri Misir
Mərdanov, Yeni Azərbaycan Partiyası sədrinin
müavini-icra katibi Əli Əhmədov, Azərbaycan
Respublikası Dövlət Neft Şirkətinin prezidenti
Rövnəq Abdullayev, Bakı Dövlət Universitetinin
rektoru, akademik Abel Məhərrəmov, ARDNŞ-ın
birinci vitse-prezidenti Xoşbəxt Yusifzadə,
Milli Məclisin deputatlarının, ADNA-nın
professor-müəllim və tələbə heyətinin, KİV
nümayəndələri və başqalarının iştirak etdiyi
təntənəli mərasimi ADNA-nın rektoru, əməkdar elm
xadimi, akademik Siyavuş Qarayev giriş sözü ilə
açıb. S.Qarayev öz çıxışında ümummilli liderin
Azərbaycan xalqı qarşısında görkəmli
xidmətlərini, onun dövlət başçısı vəzifəsində
bütün fəaliyyəti dövründə akademiyanın
professor-müəllim heyətinə və tələbə
kollektivinə həqiqətən atalıq qayğısı
göstərməsini qeyd edib. Rektor bildirib ki,
ümummilli lider Heydər Əliyev Sənaye
İnstitutunda (indiki ADNA) iki il
müvəffəqiyyətlə oxuyub. Lakin Böyük Vətən
müharibəsi başlayıb və Heydər Əliyevin qəlbində
xoş xatirələr qoymuş, onda möhkəm intizam və
iradə kimi keyfiyyətlər aşılayan, dərin
biliklərə yiyələnməsinə kömək edən təhsil illəri
yarımçıq qalıb. Heydər Əliyev inşaat
fakültəsinin memarlıq bölməsində oxuyub. Onun
gənclik illərinin bəlkə də ən unudulmaz
xatirələri məhz bu ali təhsil müəssisəsində
oxuduğu dövrlə bağlıdır.
 Mərasimdə
çıxış edən Yeni Azərbaycan Partiyası sədrinin
müavini - icra katibi Əli Əhmədov qeyd edib ki,
bu gün Avropanın enerji məkanında öz töhfəsini
verən Azərbaycanın neft-qaz strategiyasının
təməlinin qoyulması məhz ümummilli lider Heydər
Əliyevin adı ilə bağlıdır. Eləcə də ümumi neft
strategiyasının həyata keçirilməsi sahəsində,
iqtisadiyyatın müxtəlif sahəsində nailiyyətlər
əldə edilib. Ulu öndərin neft strategiyası
Azərbaycanın müstəqilliyinə, onun dünyada
rolunun və nüfuzunun daha da artmasına xidmət
edib. Məhz bu səbəbdən də o, qədirbilən
Azərbaycan xalqının qəlbində daim yaşayacaq. Bu
təhsil ocağında ulu öndərin barelyefinin
qoyulması da tarixi əhəmiyyət daşıyır.
Sonda tədbir iştirakçıları ADNA-nın tarix
muzeyində ali təhsil ocağının keçdiyi yol, eləcə
də ulu öndər Heydər Əliyevin həyat və
fəaliyyətini əks etdirən fotostendlərlə tanış
olublar.
ƏDALƏT |
|
