|
 Təhsil
Nazirliyinin müvafiq əmrinə əsasən Bakı Pedaqoji
Kadrların İxtisasartırma və Yenidənhazırlanma
İnstitutunun rektoru, professor Asəf Zamanov və
Azərbaycan Dillər Universitetinin tədris işləri
üzrə prorektoru, professor Natiq Yusifov 1-6 may
2011-ci il tarixlərində Qazaxıstan
Respublikasında ezamiyyədə olmuş, Astana
şəhərində 3-5 may tarixlərdə keçirilmiş "İslam
Ölkələrinin Təhsilin Keyfiyyətinin Təminatı
Agentlikləri Assosiasiyası"nın iclaslarında
iştirak etmişlər. Türkiyə, Şimali Kipr,
Malayziya, Qazaxıstan, Azərbaycan, Bəhreyn,
Uqanda, Bosniya, Səudiyyə Ərəbistanı, Bruney,
Pakistan, Əfqanıstan və digər islam ölkələrinin
(cəmi 17 ölkə) mütəxəssislərinin iştirakı ilə
adıçəkilən assosiasiya təsis edilmişdir.
Assosiasiya İslam ölkələrində ali təhsilin
keyfiyyətinin təminatı üçün məsuliyyət daşıyan
qurumların işinin idarə olunmasına kömək
məqsədilə təsis edilmiş qeyri-hökumət
təşkilatıdır. Assosiasiyanın əsas məqsədi İslam
dünyası ölkələrində ali təhsilin keyfiyyətini
yüksəltmək, təhsilin keyfiyyətinin yüksəldilməsi
ilə məşğul olan qurumların mütərəqqi
təcrübəsinin mübadiləsi və bu sahədə
əməkdaşlığın genişləndirilməsindən ibarətdir. Bu
məqsədlə keyfiyyətin təminatı prinsipləri və
standartları hazırlanır, treninqlər təşkil
edilir, məsləhət xidmətləri yaradılır.
Assosiasiyanın əsasnaməsinə görə, yalnız
tamhüquqlu üzvlər assosiasiyanın rəhbərliyində
və idarəetmədə iştirak edə bilərlər. İnanırıq
ki, Azərbaycan mütəxəssislərinin də təmsil
olunduğu assosiasiya təhsilin keyfiyyətinin
yüksəlməsinə öz təsirini göstərəcək və
Azərbaycan təhsilinin dünya elm və təhsil
sisteminə inteqrasiyasına kömək edəcəkdir.
Qazaxıstan Respublikasının birinci Prezidenti
Nursultan Nazarbayevin Astana şəhərindəki
muzeyinə ekskursiya iştirakçılarda xüsusi
təəssürat yaratdı.
Səfər zamanı təhsil işçilərinin ixtisasının
artırılması və yenidənhazırlanması, professional
hazırlığın elmi-metodiki müşayiəti,
ixtisasartırma və yenidənhazırlanma kurslarının
qarşılıqlı fəaliyyət sistemi ilə tanışlıq,
ixtisasartırma və yenidənhazırlanma üzrə proqram
mübadiləsi və onların qiymətləndirilməsi,
müdavimlər üçün birgə mühazirə və məşğələlərin
təşkili, elmi-tədqiqat fəaliyyətində birgə
iştirak, seminar və mühazirələrin keçirilməsi
üçün professor-müəllim heyətinin mübadiləsi, iş
təcrübəsinin öyrənilməsi və innovativ
layihələrin hazırlanması üçün pedaqoji və rəhbər
işçi qruplarının mübadiləsi, beynəlxalq təhsil
layihələrində birgə iştirak, birgə regional və
beynəlxalq elmi-praktik simpozium, konfrans,
seminar və treninqlərin keçirilməsi, dövri
nəşrlərin mübadiləsi məqsədi ilə Bakı Pedaqoji
Kadrların İxtisasartırma və Yenidənhazırlanma
İnstitutu və Astana Pedaqoji Kadrların
İxtisasartırma və Yenidənhazırlanma İnstitutu
arasında elm və təhsil sahəsində əməkdaşlığa
dair müqavilə də bağlanmışdır. Müqaviləni
Azərbaycan tərəfdən professor Asəf Zamanov,
Qazaxıstan tərəfdən dosent Lyudmila Sainova
imzalamışlar.
Qeyd etmək lazımdır ki, bu müqavilə Bakı
Pedaqoji Kadrların İxtisasartırma və
Yenidənhazırlanma İnstitutunun son 3 ildə
beynəlxalq əməkdaşlıq sahəsində imzaladığı sayca
13-cü müqavilədir. |
|
