Bakının Nizami rayonundakı Milli Qəhrəman
Y.Kovalyov adına 229 nömrəli orta məktəbin I "d"
və I "ç" siniflərində "Əlifba" bayramı keçirilib.
20 şagirdin təhsil aldığı I "d" sinfi yüksək
tərtibatla bəzədilmişdi. Uşaqların, müəllimlərin
və valideynlərin sevinci yerə-göyə sığmırdı. Bu
tədbir həm də Aysel Məhərrəmova, Aişə Mansurova,
Mədinə Bayramova, Məhəmməd Həsənov, Riad Əmirov,
Rəna Məmmədova, Dilbər Məmmədzadə, Elxan
Məmmədzadə, Röya Salmanova kimi əlaçıları olan I
"d" sinfinin, şagirdlərin sevimli müəllimi Bahar
Novruzovanın illik hesabatı idi.
Azərbaycanın Dövlət himninin səslənməsi ilə
başlanan bayram tədbirinin davamında şagirdlər
müxtəlif bədii kompozisiya, səhnəcik, mahnı və
rəqslərlə öz məharətlərini nümayiş etdirdilər.
Uşaqların ifasında ana dilimizlə yanaşı, ingilis
dilində də doğma Azərbaycanımızı, anaları, əziz
müəllimləri tərənnüm edən şeirlər söyləndi.
Əllərində gül səbətləri tutmuş şagirdlərin
özlərinə məxsus rəqs etmələri tədbirə xüsusi
rəng qatdı. Məktəbin direktoru Fəridə Bağırova
üzünü böyük fərəh hissi ilə müəllim, valideyn və
şagirdlərə tutub dedi:
- Bu gün bizim üçün çox unudulmaz bir gündür.
Körpə balalarımız "Əlifba"nı sona çatdırıblar.
Bu, onların təhsildə ilk uğurları, ilk
qələbələridir. Bahar müəllimin böyük əməyi,
zəhməti sayəsində uşaqların necə inkişaf
etdiyinin bugünkü tədbirdə canlı şahidi olduq.
Mən böyük iftixar hissilə Bahar müəllimə çox sağ
ol deyirəm. Məktəbimizin bütün tədbirlərində
fəal iştirak edən musiqi müəllimi Zülfiyyə
xanımın da əməyini xüsusilə qiymətləndirirəm.
Bəli, zaman gələcək, bu kiçik balalarımız
böyüyüb ali təhsil ocaqlarında oxuyacaq,
ata-analarını, müəllimlərini xoş soraqları ilə
sevindirəcək, məktəbimizin adını daim uca
tutacaq, xalqımıza layiqli övlad olacaqlar. Biz
də buna inanırıq.
Reyhan ÇƏLƏBİ,
valideyn |
|