Mayın 31-də
Bakıdakı 20 nömrəli məktəb-liseydə
onbirincilərin məktəbi bitirməsi münasibətilə
"Son zəng" keçirildi. Tədbirdə Təhsil
Nazirliyinin, Yasamal Rayon İcra
Hakimiyyətinin, Bakı Şəhəri üzrə Təhsil
İdarəsinin, Rusiyanın Azərbaycandakı
səfirliyinin nümayəndələri və digər qonaqlar
iştirak edirdilər. Tədbiri giriş sözü ilə açan
liseyin direktoru Sabir Məmişov cari dərs
ilində liseyin qazandığı uğurlar haqqında qısa
da olsa məlumat verdi və bu il liseyi bitirən
170 şagirdin buraxılış imtahanlarında iştirak
edəcəklərini qeyd etdi. Direktor XI sinfi
qurtaran şagirdləri və onların valideynlərini
təbrik etdi. Azərbaycan Respublikasının Dövlət
himni səsləndi və dövlət bayrağı marş sədaları
altında mərkəzə gətirildi.
Tədbirdə
Yasamal Rayon İcra Hakimiyyətinin aparıcı
məsləhətçisi Hüseyn Əsgərov, Təhsil Nazirliyinin
nümayəndəsi Bəşarət Məmmədli, Rusiyanın
Azərbaycandakı səfirinin birinci müavini
Mixail Ustinov, Bakı Şəhəri üzrə Təhsil
İdarəsinin müdir müavini Məhəbbət Qarabağlı,
lisey VMA-nın sədri Gülnarə Aslanova və digər
şəxslər onbirinciləri məktəbi bitirmələri
münasibətilə təbrik etdilər və onlara uğurlar
arzuladılar.
Liseyin rus
bölməsinin XI "a" sinif şagirdi, dərs əlaçısı,
qızıl medala namizəd Fəridə Əliyeva, builki
məzunlardan artıq tələbə adını alanlar -
Moskva Xalqlar Dostluğu Universitetinin
tələbəsi Pərvin Abbasova və Şimali Qafqaz Dövlət
İdarəçilik Akademiyasının tələbəsi Sənubər
İmanovanın çıxışları məktəblilər tərəfindən
maraqla qarşılandı. Məzunlar öz çıxışlarında
"Son zəng"i heç vaxt unutmayacaqlarını
söylədilər. Həmin gün məzunları təbrik etmək
üçün gələn birincilər onbirincilər qarşısında
son zəngi çaldılar, şeir söylədilər və mahnı
oxudular.
Sonda
məzunlar müəllimləri ilə birlikdə məktəbin
qarşısında xatirə şəkli çəkdirdilər.
Şakir CƏFƏROV |