|
 "2008-2012-ci
illərdə Azərbaycan Respublikasında təhsil
sisteminin informasiyalaşdırılması üzrə Dövlət
Proqramı" çərçivəsində yaradılmış Azərbaycan
Təhsil Şəbəkəsində tətbiq olunan müxtəlif
texnologiyalar məktəblilərin İnternet
təhlükəsizliyini tam təmin edir. Təhsil
Nazirliyinin Təhsil Sisteminin
İnformasiyalaşdırılması İdarəsindən verilən
məlumata əsasən, informasiya texnologiyalarının
sürətlə inkişaf etdiyi bir dövrdə uşaqların
İnternetdə təhlükəsizliyinə xüsusi diqqət
yetirilir.
Hazırda məktəb yaşlı uşaqlar İnternetin ən aktiv
istifadəçilərindəndir. İnternetin geniş miqyasda
informasiya mənbəyi olduğundan bu məlumatların
yaş məhdudiyyəti olmadan nəzarətsiz yayılması
uşaqların psixikasına mənfi təsir göstərir. Bu
halların qarşısının alınması və uşaqların
arzuolunmaz məlumatlara çıxışının
məhdudlaşdırılması hazırda qarşıda duran vacib
məsələlərdən biridir.
Şagird və tələbələrin psixikasını, o cümlədən
mənəviyyatını qorumaq, yetişən nəslin sağlam
formalaşması məqsədilə onların zərərli
informasiyalardan istifadəsini məhdudlaşdırmaq
üçün ATŞ çərçivəsində Vebsens (Websense)
proqramı tətbiq olunur. Vebsens proqramı
avtomatlaşdırılmış şəkildə bütün saytları
filtrasiya edir və qadağa qoyulmuş
kateqoriyalara aid olan İnternet-resursa girişi
qadağan edir. Vebsens proqramı vasitəsilə
İnternetdə yerləşən video və audio fayllara da
çıxışı məhdudlaşdırmaq mümkündür. Bu texnologiya
İnternet-axtarış sistemlərində müxtəlif dillərdə
60-a qədər kateqoriya üzrə zərərli
informasiyanın axtarışını məhdudlaşdırır və
uşaqların zərərli məzmundan maksimal müdafiəsini
təmin etməyə imkan verir.
"2008-2012-ci illərdə Azərbaycan Respublikasında
təhsil sisteminin informasiyalaşdırılması üzrə
Dövlət Proqramı" çərçivəsində həyata keçirilən
İnternet məzmunun təhlükəsizliyinin təmin
olunması məqsədi ilə Təhsil Nazirliyində
İnternetdən istifadə məsələləri üzrə Şura
yaradılmışdır. Şura zərərli informasiya
kateqoriyalarını müəyyənləşdirir və bu
kateqoriyaların tətbiq olunmasını tənzimləyir.
Hicran ƏKBƏROVA |
