Bakıdakı 61 nömrəli orta məktəbin direktoru
Zenfira Şıxəliyevadan aldığımız məlumatda
bildirilir ki, sınaq imtahanları və onun
nəticələri ilə əlaqədar valideyn yığıncağı
keçirilib. Yığıncaqda valideynlərlə qarşılıqlı
işin təşkilindən söz açılıb və təlim-tərbiyə
sahəsində onların rolu qeyd edilib. Bildirilib
ki, məktəblə ailənin qarşılıqlı əlaqəsi olmayan
yerdə mükəmməl təhsildən, tərbiyədən söz gedə
bilməz. Çünki təlim-tərbiyə kompleks prosesdir
və onun səmərəliliyini müəllimlərlə
valideynlərin, məktəblə ailənin birgə səyi
nəticəsində yüksəltmək mümkündür.
242 nömrəli orta məktəbin direktoru Akif
Rəsulov qeyd etdi ki, buraxılış imtahanlarında
yaxşı nəticə əldə etmək üçün pedaqoji kollektiv
valideynlərlə birgə çalışır, valideynlər
övladlarının yüksək biliyə yiyələnmələri,
vətənpərvərlik ruhunda tərbiyə olunmaları üçün
pedaqoji kollektivə yaxından köməklik
göstərirlər.
250 nömrəli orta məktəbin direktoru Nazim
Adıgözəlov isə dedi ki, rəhbərlik etdiyi
məktəbdə hər bir valideyn uşaqlarının yaxşı
oxumasında, hərtərəfli inkişafında, Vətənə,
doğma dilinə, milli və ümumbəşəri dəyərlərə
hörmət və məhəbbət ruhunda böyüyüb
formalaşmasında pedaqoji kollektivə yaxından
kömək edir, tədris ocağının bütün tədbirlərində
fəallıq göstərirlər. |
|