|
İşlədiyim 286
nömrəli məktəb paytaxtın ən iri ümumtəhsil
müəssisələrindən olmasına baxmayaraq, son
illərədək özünün təhsil göstəriciləri ilə o
qədər də fərqlənmirdi. Lakin artıq bir neçə
ildir ki, 286 nömrəli məktəbin fəaliyyətində
köklü dəyişiklik olmuşdur. Məktəbimizin
direktoru, fizika-riyaziyyat elmləri üzrə
fəlsəfə doktoru, dosent Mübariz Vəliyevin
rəhbərliyi altında məktəbin idarə olunmasının
demokratikləşdirilməsi, təhsilin keyfiyyətinin
yüksəldilməsi məqsədi ilə bir sıra tədbirlər
həyata keçirilmişdir və onlar indi də davam
etdirilməkdədir.
 2008-2009-cu
tədris ilində məktəbdə əsaslı təmir işləri
aparılmış, məktəbdaxili su və kanalizasiya
sistemi yenisi ilə əvəzlənmiş, elektrik sistemi
tam dəyişdirilmişdir. Sinif otaqları təmir
olunmuş, xüsusi tərtibata malik, hər cür
avadanlıqla təmin olunmuş akt zalı, kitabxana,
kompüter və fənn kabinetləri yaradılmışdır.
Məktəbimizdə
təhsilin humanistləşdirilməsi baxımından
təlim-tərbiyə prosesinin
diferensiallaşdırılması, fərdiləşdirilməsi
prinsiplərini, müasir təlim forma və üsullarını
tətbiq etməklə fərqlənən, əsl vətəndaşlıq
mövqeyində duran, şagirdlərə vətəndaşlıq ruhu
aşılayan müəllimlər çoxdur. Onlardan
təlim-tərbiyə işləri üzrə direktor müavini
Aybəniz Qurbanovanı, fizika-riyaziyyat elmləri
üzrə fəlsəfə doktoru Gültəkin Ağaverdiyevanı,
tarix elmləri üzrə fəlsəfə doktoru Qalina
Əlibəylini, filologiya elmləri üzrə fəlsəfə
doktoru Arzu Hüseynovanı, kimya müəllimi Pərvanə
Ağazadəni, riyaziyyat müəllimi Gülxar
Bağbanlını, tarix müəllimi Təranə Salahovanı,
ibtidai sinif müəllimləri Ofelya Məmmədovanı,
Almaz Əsgərovanı, Rahilə Allahverdiyevanı,
Səlbinaz Nuriyevanı, Sevinc Əliyevanı və b.
misal göstərmək olar.
2009-2010-cu
tədris ilində məktəbimizin müəllimlərindən Naibə
Ələkbərova "Əməkdar müəllim" fəxri adına layiq
görülüb, Gülnarə Əliyeva isə "Qabaqcıl təhsil
işçisi" döş nişanı ilə təltif olunub. Sevinc
Əliyeva isə Təhsil Nazirliyinin və Bakı Şəhəri
üzrə Təhsil İdarəsi tərəfindən Fəxri fərmanla
mükafatlandırılıb. Həmin tədris ilində
məktəbimizin özü də böyük uğur qazanaraq
möhtərəm Prezidentimizin sərəncamı ilə keçirilən
"Ən yaxşı ümumtəhsil məktəbi" müsabiqəsinin
qalibi olmuşdur.
Ötən il
məktəbimizi bitirən 173 məzundan 88-i ali təhsil
müəssisələrinə daxil olmuşdur. Məzunlardan 11-i
qəbul imtahanlarında 600-dən yuxarı bal
toplamışdır. Məzunlarımızdan hazırda Azərbaycan
Tibb Universitetində oxuyan Eldəniz Yunusov və
İlahə Fərəcli Prezident təqaüdçüləridir.
Məktəbimiz təhsilin keyfiyyət və səviyyəsinin
yüksəldilməsi sahəsində qazandığı nailiyyətlərə,
o cümlədən məzunların ali məktəblərə qəbulunda
ardıcıl olaraq göstərdiyi yüksək nəticələrə
görə Bakı Şəhəri üzrə Təhsil İdarəsi tərəfindən
Fəxri fərmanla təltif olunub.
Məktəbimizdə
şagirdlərin vətənpərvərlik tərbiyəsinə xüsusi
diqqət yetirilir, bu məqsədlə tez-tez müxtəlif
mövzularda tədbirlər keçirilir. Görkəmli
alimlər, sənətkarlar, yazıçı və şairlərlə
görüşlər, müsabiqələr, disputlar şagirdlərin
dünyagörüşünü genişləndirməyə xidmət etməklə
yanaşı, onlarda sərbəst fikir söyləmək, müstəqil
öyrənmək bacarıqları yaradır, müsbət əxlaqi
keyfiyyətlər aşılayır.
Məktəbimizdə
buraxılış imtahanlarına geniş hazırlıq işləri
görülüb. İnanırıq ki, məzunlarımızın hamısı
mərkəzləşdirilmiş qaydada keçirilən buraxılış
imtahanını uğurla verərək attestat alacaq.
Gülmirə ƏLİYEVA,
Bakıdakı 286 nömrəli məktəbin Azərbaycan dili və
ədəbiyyat müəllimi |
|
