|
 Bakının
Xətai rayonundakı 240 nömrəli körpələr evi-uşaq
bağçası bu il 33 yetirməsini məktəbə yola salır.
Bu münasibətlə iyunun 10-da burada "Əlvida,
bağça" mərasimi keçirildi. Məktəbəqədər təhsil
pilləsini başa vuranların son tədbirində onların
valideynləri ilə yanaşı, qonaqlar - Təhsil
Nazirliyindən Nigar Zeynalova, Təhsil
Problemləri İnstitutunun əməkdaşı Laləzar
Cəfərova, Bakı Şəhəri üzrə Təhsil İdarəsinin
metodisti Tamilla Useynova, 55, 245, 222, 235
nömrəli körpələr evləri-uşaq bağçalarının
müdirləri Zərifə Bəşirova, Roza Əliheydərova,
Aygün İsgəndərova, Səlahət Musayeva, 264 nömrəli
məktəbin direktor müavini Məhminə Rüstəmova və
b. iştirak edirdilər.
Yeri gəlmişkən qeyd edək ki, bağçalarda
keçirilən "məzun" tədbirləri artıq çoxdan
hesabat xarakteri alıb. Bayram mərasimləri elə
təşkil olunur ki, uşaqların məktəb təliminə
necə hazırlanmaları onların tədbirdəki
çıxışlarından məlum olsun. Buna görə də bayram
tədbirinin proqramına nitq inkişafı, sadə
hesablama bacarığı, ətraf aləmlə tanışlıq, rəsm,
musiqi və s. ilə bağlı nömrələr salınır.
240 nömrəli körpələr evi-uşaq bağçasının
məktəbəhazırlıq qrupunun tərbiyəçiləri İradə
Nəcəfova, Afət İbrahimova, tərbiyəçi köməkçisi
Mərziyə Mustafayeva, bağçanın musiqi rəhbəri
Günay İsrafilova da bayram tədbirinin
ssenarisini tərtib edərkən həmin prinsipi əsas
götürmüş və maraqlı proqram hazırlamışdılar. Ona
görə də uşaqlar tədbir boyu öz çıxışları -
söylədikləri şeirlər, ifa etdikləri mahnı və
rəqslər, göstərdikləri tamaşalarla məktəb
təliminə hazır olduqlarını nümayiş etdirdilər.
Onu da qeyd edək ki, bağçanın məzun olmağa
hazırlaşan körpələri Bakı Şəhəri üzrə Təhsil
İdarəsinin bu ilin aprel-may aylarında
məktəbəqədər təhsil müəssisələrinin yetirmələri
arasında keçirdiyi "Bilik, bacarıq və qabiliyyət"
müsabiqəsində fəal iştirak etmişlər. Nulüfər
Tağıyeva "Nitq inkişafı" nominasiyası üzrə
müsabiqədə 3-cü olmuş, Nuray Həsənli isə "Musiqi"
nominasiyasında IV yeri tutmuşdur. Onların hər
ikisi və "Rəsm" nominasiyası üzrə həvəsləndirici
yerə layiq görülmüş Məhərrəm Mirzəyev Bakı
Şəhəri üzrə Təhsil İdarəsinin fəxri fərmanları
ilə təltif olunmuşlar. Müsabiqənin rayon
mərhələsində isə 11 uşaq I, II, III yerləri
tutaraq bağçanın rəhbərliyi tərəfindən fəxri
fərmanlarla mükafatlandırılmışdır. Bayram
tədbirini rövnəqləndirən də əsasən onların
çıxışları oldu.
Bağçanın al-əlvan bəzənmiş musiqi zalında
keçirilən tədbir "Azərbaycan" mahnısının
sədaları altında başlandı. Əllərində kiçik
bayraqlar və gül dəstələri tutmuş uşaqlar zala
daxil olaraq "Sizə salam gətirmişəm" mahnısı ilə
tədbir iştirakçılarını salamladılar. Sonra 3
uşaq irəli çıxıb artıq bağça ilə vidalaşma
anının çatdığını, bir azdan məktəbə
gedəcəklərini bildirdilər və bu münasibətlə
tərbiyəçilərini, valideynlərini təbrik etdilər.
Uşaqlardan ibarət xor "Ay ana, məni məktəbə
yazdırsana" mahnısını ifa etdi.
Bağçanın müdiri Sədaqət Rəhimova, tərbiyəçilər
körpə fidanlara təbriklərini yetirdilər, onların
valideynlərinə gözaydınlığı verdilər. Jalə,
Oqtay, Nuray, Ayxan "Müəllim" şeirini söylədilər.
Afina şeirlə kiçik qrup adından məktəbə
gedənlərə uğurlar arzuladı. Uşaqlar "Vals"
oynadılar. Mətin, Məhərrəm və Riyad "Məktəb"
şeirini söylədikdən sonra "Məktəbə gedəcəyik"
mahnısı ifa olundu.
Aparıcı nömrələri elan etdikcə uşaqlar iki-bir,
üç-bir irəli çıxıb məharətlərini göstərdilər.
Uşaqlar çıxışlarını "Əlvida, bağça" şeiri və "Əziz
bağça" mahnısı ilə başa çatdırdılar.
Sonra müsabiqə qaliblərinə fəxri fərmanlar,
diplomlar, hədiyyələr verildi.
Qonaqlar söz alaraq uşaqları təbrik etdilər,
onların çıxışlarından razı qaldıqlarını, məktəb
təliminə yaxşı hazırlaşdıqlarını qeyd etdilər.
Yusif ƏLİYEV |
|
