|
Naxçıvan
Dövlət Universitetinin nəzdində fəaliyyət
göstərən Heydər Əliyev Universitetinin 147-ci
məşğələsi keçirildi. "Heydər Əliyev və gənclər
siyasəti: perspektivlər, reallıqlar" mövzusunda
məşğələni giriş sözü ilə rektor, akademik İsa
Həbibbəyli açaraq ümummilli liderin gənclərə
qayğı və himayəsindən, müstəqil dövlət
quruculuğu prosesində bütün sahələrdə istedadlı,
yüksək intellektual potensiala malik gənclərə
böyük etimad göstərməsindən danışdı. Vurğulandı
ki, bu gün də ölkə başçısı İlham Əliyev
tərəfindən dahi öndərin gənclər siyasəti uğurla
davam etdirilir, gənclərin kamil vətəndaş,
yüksək ixtisaslı mütəxəssis kimi yetişmələri
üçün hərtərəfli şərait yaradılır.
Sonra Sosial
idarəetmə və hüquq fakültəsinin tələbəsi İntizar
Məmmədovanın "Gənclər siyasəti XXI əsrdə:
inkişafın yeni perspektivləri", NDU YAP Gənclər
təşkilatının sədri Elçin Əliyevin "Heydər Əliyev
və Azərbaycan gəncləri dövlət proqramının
prioritet istiqamətləri" mövzusunda məruzələri
dinlənildi. Məruzələrdə Azərbaycan gənclərinin
cəmiyyətin inkişafındakı rolunu, ölkənin gələcək
müqəddəratında iştirakını və məsuliyyətini
artırmaq, paytaxt və regionlarda yaşayan
gənclərin fikir mübadiləsinə şərait yaratmaq,
onların dövlət qurumları, hökumət nümayəndələri
ilə əlaqələrini möhkəmləndirmək istiqamətində
ümummilli lider Heydər Əliyevin müstəsna
xidmətlərindən bəhs olundu. Qeyd edildi ki, hələ
1995-ci ildə Azərbaycan Gənclərinin Forumunun
keçirilməsi təşəbbüsü irəli sürülmüş, 1996-cı,
1999-cu illərdə keçirilmiş gənclərin I və II
forumlarında ümummilli lider Heydər Əliyev
şəxsən iştirak edərək tarixi çıxışlarında
gəncliyə qiymətli tövsiyələr vermişdir. 2005-ci
ildə Azərbaycan Respublikasının Prezidenti cənab
İlham Əliyev tərəfindən imzalanmış "Azərbaycan
Gəncliyi Dövlət Proqramı (2005-2009-cu illər)"
gəncliyin inkişafı məqsədilə mühüm vəzifələrin
yerinə yetirilməsi gənclərdə böyük ruh
yüksəkliyi, potensial enerji yaratmışdır.
Vurğulandı ki, milli gənclik dahi öndərin
dövlətçilik, azərbaycançılıq ideyalarını bundan
sonra da sədaqətlə davam etdirəcək.
Mehriban SULTAN |
|
