|
Təhsil və onun cəmiyyətdə oynadığı rol Lənkəran
Dövlət Universitetinin professor-müəllim, tələbə
heyətini, valideynləri və media təmsilçilərini
bir araya gətirib.
"Təhsil və cəmiyyət" mövzusunda keçirilən
"dəyirmi masa"da LDU-nun rektoru Asəf İsgəndərov
çıxış edərək qloballaşan dünyada hər bir xalqın
inkişafının təhsilin inkişafı ilə üst-üstə
düşdüyünü bildirib. Fikrini konkret faktlarla
əsaslandıran rektor Yaponiya, Almaniya, İsveç,
İsrail dövlətlərinin inkişaf yolundan söz açıb,
bu xalqların dünya elmində qazandıqları bütün
uğurların təhsilə göstərilən ümumxalq
dəstəyindən bəhrələndiyini deyib. Təklikdə ən
güclü müəllim, tələbə, valideyn böyük uğura imza
ata bilməz, - deyən professor A.İsgəndərov
bunların tamlıqda uğur mənbəyi olduğunu qeyd
edib. Valideynlərin, media təmsilçilərinin
görüşə qatılmağından istifadə edən rektor hamını
təhsilin inkişafı naminə birgə əməli fəaliyyətə
və media təmsilçilərini cəmiyyəti bu işə
səfərbər etməyə çağırıb. Tədbirdə
yazıçı-publisist Hafiz Mirzə, "Respublika"
qəzetinin xüsusi müxbiri Əlisəfa Həsənov bu
məsələ ilə əlaqədar fikirlərini bildiriblər.
Tədbir diskussiya şəraitində davam edib,
müzakirəyə qatılan tələbələr də fikirlərini
səsləndiriblər. Yekunda bütün iştirakçılara
fəallıqlarına görə minnətdarlıq bildirən rektor
Asəf İsgəndərov belə müzakirələrin davamlı
olacağını deyib. Hər hansı millət top- tüfəng
gücünə yox, elm - savad gücünə inkişaf edir, -
yazıçı-dramaturq Nəriman Nərimanovun bu sözləri
ilə tədbiri yekunlaşdıran professor Asəf
İsgəndərov bacarıqlı, istedadlı tələbələrin daim
diqqətdə saxlanılacağını, Azərbaycan elminin
inkişafı naminə onlara hər cür dəstək
göstəriləcəyini deyib.
Ülkər İSMAYILOVA,
LDU-nun Mətbuat və informasiya şöbəsinin
əməkdaşı |
|
