Bakıdakı
69 nömrəli körpələr evi - uşaq bağçasında "Əlvida,
bağça, salam, məktəb" adlı musiqili-əyləncəli
tədbir keçirildi. Həmin gün bağçanın geniş və
işıqlı musiqi zalı balacalar üçün bayramsayağı
bəzədilmişdi. Foyedə isə balacaların əl
işlərindən ibarət müxtəlif boyalarla işlənmiş
rəsmlər göz oxşayırdı. Uşaqlar rəsmlərdə öz
bacarıqlarını, istedadlarını, nəyə qadir
olduqlarını göstərməyə çalışırdılar.
Balacalar çox sərbəst idilər. Rza, Elnur, Ümid,
Elmira, Fəridə, Nihad və başqaları Azərbaycan,
ana, müəllim, vətənpərvərlik mövzularında,
Azərbaycanın milli qəhrəmanları haqqında çoxlu
şeirlər söylədilər, dünya xalqlarının milli
rəqslərini ifa etdilər, səhnəciklər göstərdilər.
Onlar çoxlu sayda riyazi düsturlar həll etdilər.
Yusif və Nigarın dostluq, əmək və s. haqqında
söylədikləri atalar sözləri tamaşaçıları
heyran etdi.
Bağçanın müdiri Solmaz Quliyeva ömrümüzün bəzəyi,
sevinci və fərəhi olan körpələrə diqqət və
qayğıdan danışaraq onların firavan yaşaması və
sağlam böyüməsi üçün hər cür şəraitin olduğunu
bildirdi. Qeyd etdi ki, bu il Bakı şəhərində
məktəbəqədər yaşlı uşaqlar arasında keçirilən "Bilik,
bacarıq və qabiliyyət" müsabiqəsində bağçanın
3 uşağı müxtəlif nominasiyalar üzrə qalib olub.
Yasəmən Səfərova "Bu dünya hamıya beşikdir"
mövzusunda, Əminə Allahverdiyeva rəsm üzrə,
Nicat Babayev isə riyaziyyat fənni üzrə qalib
adını qazanıblar. Bu il 25 uşaq məktəbə yola
salınır. Onların hamısı məktəb təliminə hazırdır.
Balacaların bağçada yiyələndikləri bilikləri
təhsil alacaqları orta məktəbdə də həvəslə davam
etdirəcəklərinə ümid bəslədiyini bildirən Solmaz
xanım balaca məzunlarla daim əlaqə
saxladıqlarını da qeyd etdi.
Sifai SƏFƏROVA |
|