|
Balakən rayonunun Katex kəndində 2 nömrəli tam
orta məktəb üçün inşa edilən 220 şagird yerlik
yeni binanın tikintisində tamamlama işləri
görülür.
 AzərTAc
xəbər verir ki, məktəb indiyədək keçən əsrin
50-ci illərində inşa edilmiş, qəzalı vəziyyətdə
olan binada fəaliyyət göstərmişdir. Dövlət
vəsaiti hesabına müasir standartlara uyğun
tikilən ikimərtəbəli yeni binada sinif otaqları,
fənn kabinetləri, akt və idman zalları, bufet,
kitabxana, xidməti otaqlar fəaliyyət
göstərəcəkdir.
Məktəb binasının yeni dərs ilinin başlanğıcında
istifadəyə verilməsi nəzərdə tutulmuşdur.
Ümumiyyətlə, son 5 ildə rayonda dövlət vəsaiti,
habelə Heydər Əliyev Fondunun və Dövlət Neft
Şirkətinin vəsaitləri ilə 20 yeni məktəb binası
tikilib istifadəyə verilmiş, bir məktəb binası
əsaslı təmir olunmuşdur.
Bərdə rayonunun Şahvəllər kəndində Təhsil
Nazirliyinin sifarişi ilə dövlət vəsaiti
hesabına inşa edilən 220 şagird yerlik məktəb
binasında tamamlama işləri görülür.
İkimərtəbəli binada sinif otaqları, kimya və
fizika kabinetləri, 2 laboratoriya, 2 kompüter
otağı, akt və idman zalları, bufet, kitabxana,
xidməti otaqlar, istilik sistemi yaradılmış,
həyətdə qazanxana və su hovuzları tikilmiş,
transformator qoyulmuşdur. Hazırda məktəbin
həyətinə tamet döşənir, yaşıllıqlar salınır.
Müasir standartlara cavab verən məktəb binası
lazımi avadanlıq və inventarlarla təmin olunaraq
15 sentyabr - Bilik Günündə müəllim və
şagirdlərin istifadəsinə veriləcəkdir. |
