Bu yaxınlarda Naxçıvan Dövlət Universitetinin
Elmi Şurasının qərarı ilə ali məktəbin
Magistratura şöbəsi nəzdində Tələbə Turizm
Assosiasiyası fəaliyyətə başlayıb.
Assosiasiyanın yaradılmasında məqsəd
Azərbaycanın müxtəlif bölgələrinə turist
gəzintilərinin təşkili yolu ilə turizm ixtisası
üzrə təhsil alan tələbələrin bilik və
dünyagörüşünün artırılmasından, turizm sahəsinin
inkişaf etdirilməsindən ibarətdir. Tələbə,
magistr və müəllimlərdən ibarət qrup bu
günlərdə Bakı-Qobustan-Şamaxı-Qəbələ-Şəki
istiqamətində ilk tura yollanıb. Assosiasiya
üzvləri ilə görüşən rektor, akademik İsa
Həbibbəyli bu gün ölkəmizdə milli təhsilin
inkişafı və bu sahədə görülən işlər barədə
söhbət açıb. Universitetin rektoru ali təhsilin
ikinci pilləsi olan magistratura təhsili,
magistrantların iştirakı ilə keçirilən
tədbirlər, qazanılan uğurlar barədə danışıb,
gənc magistrantların Naxçıvan Muxtar
Respublikasını ölkəmizdə, eləcə də beynəlxalq
miqyasda layiqincə təmsil etdiklərini və böyük
uğurlar qazandıqlarını qeyd edib. Akademik İsa
Həbibbəyli magistrantlara həyata keçirəcəkləri
ilk turda uğurlar diləyib.
Magistratura şöbəsinin dekanı, tarix üzrə
fəlsəfə doktoru, dosent Elbrus İsayev Tələbə
Turizm Assosiasiyası və gələcək planlar haqqında
məlumat verib. Qeyd olunub ki, tur
"Baku-Travel" şirkəti ilə birgə təşkil olunub. 5
günlük tur çərçivəsində magistrantlar Şamaxı
rəsədxanasını, Şəki Xan sarayını, İsmayıllı
rayonunun Lahıc kəndini görmək imkanı
qazanacaqlar.
Nərmin CƏFƏROVA,
NDU-nun Mətbuat şöbəsinin əməkdaşı |
|